Sr. Ricardo Croes, lider di Fraccion di partido RED ta splica cu legalisacion di Cannabis no ta den man di partido RED so. E ta amplia.
Sr. Ricardo Croes a cuminsa na bisa cu ni su persona ni Sr. Lampe no por impone ariba niun minister den nan gabinete, den nan ministerio, kico nan tin cu haci. Esey ta algo completamente eroneo y e lo no bon pa e relacion di e coalicion, ya cu lo tene diferencia di opinion y ta mete den cartera di otro, como sifuera cu e minister no ta haciendo nan trabao bon.
Partido RED ta pendiente y ta sali for di e punto di bista cu un acuerdo ta pa wordo cumpli cun’e. Partido RED ta consciente cu e gobierno den su prome periodo a hay’e ta resolve un boshi di problema, cuminsando cu e presupuesto supletorio. Sigui na januari cu’n deficit di 276 miyon florin. Nan ta un gobierno cu a campa cu casi mei biyon florin na deficit, pa djis e gobierno sigui draai so. E prome lunanan tabata trahamento di plannan, deal cu Hulanda y CAft. Tur esakinan ta tuma tempo.
No por legalisa asina no mas. Esaki mester bay segun un ‘stappenplan’. Y e legalisacion di cannabis ta hayando su atencion debido y ya e minister di Salubridad tabata tin un conferencia en conhunto cu ministernan di Salubridad di Reino, pa yega na areglonan a base di consensus. Y pa dia 30 di november tin un conferencia tras di porta cera cu expertonan y dia 1 di december, tin un conferencia cu portanan habri.
No ta pasobra cu su persona no ta skirbi articulo tur siman of no ta den prensa tur siman, no kiermen cu Sr Croes y/o coalicion no ta cumpliendo cu nan palabra ariba e tema di legalisacion. Esey ta un storia infunda pa desacredita e coalicion aki y berdad y tempo ta na nan fabor. Esey ta bay wordo demostra ora cu e cosnan de facto tuma luga. Te asina leu, palabranan di Sr. Ricardo Croes, tocante legalisacion di cannabis.