E kolomnan di lava di volcan Cumbre Vieja ta sigui lastra tur cos unda cu e pasa, den su bahada leno pa e costa di isla La Palma, na e archipielago Spaño di Canarias. Esaki a pone cu autoridadnan a bati alerta pa posibel emision di gasnan toxico.
E preocupacion ta sigui crece debi na e potretnan impactante publica door di autoridadnan y bisiñanan, cu ta mustra con e lava a caba cu matanan, caminda y casnan cu el a topa cu nan riba su caminda pa lama.
A evacua caba 6.100 persona na e isla dilanti costa noordoostdi Africa, entre nan 400 turista, segun un comunicado di Gobierno Canario.
Ademas di esaki, e tereno di e isla a sufri un deformacion medio di 28 centimeter.
E lava ta bayendo caminda pa lama, e presidente di e region Canario, Angel Victor Torres, a bisa, señalando na mesun momento su impotencia pa haci algo cu e situacion. E fenomeno a destrui casnan den e zona cu ta dedica na Agricultura.
Te cu awo, erupcion di Cumbre Vieja a destrui 185 structura, di cual 63 ta cas, e gobierno regional a informa.
Segun e sistema Europeo di control (Copernicus), e imagen satelital ta mustra cu e lava tin un area di 103 hectarea cubri di La Palma.
Preocupacion pa e efecto
E mescla di e lava cayente cu e lama (cu segun calculo haci lo tuma luga dialuna anochi), por causa explosionnan, olanan di awa cayente y hasta humanan toxico, segun Servicio Geologico di Merca (USGS).
E humanan crea door di contacto entre e dos cosnan aki ta acido y por ta peligroso si un persona yega demasiado cerca.
Awo cu e lava ta na un distancia di dos KM for di lama, e material aki ta moviendo na mas o menos 200 meter pa ora. Autoridadnan di e isla mes no a bisa na ki momento e lo yega lama.
Como medida di precaucion, gobierno regional di Canarias, a emiti un decreto pa keda na un distacia di 2 miya nautico rond di e area unda e lava lo yega lama, y a pidi tur hende pa move for di e sitio.
Cuanto e erupcion lo dura, e vocero di Instituto Volcanologico di Canarias (Involcan) David Calvo, a calcula cu esaki por ta algun siman.