CALIFORNIA, Merca- E lansamento di e raket Falcon 9 di SpaceX a provoca asombro na momenhto cu el a atravesa e shelo diabierna anochi. Pero tambe el a causa confusion, pa cual e fundador di e compania Elon Musk a haci joke bisando cu e hendenan a kere cu sigur nan a wak un UFO Norcoreano.
The L.A. Times a raporta cu Space X su di 18 lansamento di e aña aki a tuma luga pa 5 or y 27 di atardi/anochi. E raket a wordo lansa for di e base aero di Vandenberg, cu 10 satelite abordo, cual a wordo desplega cu exito den un orbita terestre abao pa Iridium Communications.
Diabierna autoridadnan a avisa cu e lansamento lo por wordo mira den e area di Los Angeles te cu e parti sur, pero asina mes esaki ta tuma hopi pa sorpresa. Associated Press a raporta cu e yamadanan a cuminsa drenta den e canalnan di television te for di San Diego, 200 miya leu for di e base aero, puntrando kico tabata e causa di e iluminacion.
Chauffeurnan a para nan autonan ariba e autopista pa saca potret y filma e evento. Turistanan na e studio di Warner Brothers L.A. a kere cu e sendero largo luminoso den shelo tabata tin di haber cu un pelicula.
Un usuario di Twitter, Max Power a manda un tweet pa Elon Musk, dunando e danki pa e “debate pret over di alien den su seno familiar una bes cu nan a wak e raket den shelo awe nochi”.
Musk tabata feliz di a complace e speculacion. “Definitivamente tabata extraterestrenan”, el a contesta ariba Twitter. Mas laat, e fundado di SpaceX a publica un video di e lansamento , cu e la describi como “Nuclear UFO from North Korea”.
Fuente: http://www.newsweek.com