Lansamento di Fundacion Plataforma Aruba

Plataforma Aruba ta anuncia e lansamento oficial di e fundacion, un organisacion non-profit cu ta kere den e efectonan positivo di e combinacion di arte y enseñansa. Plataforma Aruba ta cuminsa cu e proyecto Arte Contemporaneo den Biblioteca y un Pilot Program den e Orthopedagogisch Centrum Aruba. E lansamento a tuma lugar diabierna merdia dia 5 di juli na Biblioteca Nacional Aruba (Oranjestad).

Fundacion Plataforma Aruba tin e placer pa introduci nan mes……

Posted by MasNoticia.com on Friday, July 5, 2019

Plataforma Aruba ta desaroya actividad y proyectonan pa e comunidad Arubano combinando arte visual contemporaneo y enseñansa. Mision ta pa crea experiencianan unda ta aporta na e comprendimento di arte visual contemporaneo, preserva Aruba su herencia cultural actual via documentacion y e produccion di material academico y contribui na e profesionalisacion di e sector local.
E enfoke riba arte contemporaneo local a bin di e interes pa comparti y enfatisa su rol importante den nos sociedad. Arte visual contemporaneo ta expresa y materialisa e pensamento, esencia y realidad di nos comunidad actual. E ta aporta na e concientisacion cultural y ta reenforza participacion sano den comunidad y cultural. E combinacion di arte y enseñansa ta brinda un oportunidad pa desarroya metodologianan eduativo nobo cu ta ofrece un enfoke mas integral, amplio y relevante pa e comunidad.
Plataforma Aruba ta un iniciativa di historiador di arte, Ana Maria Hernandez, cu experiencia den e area di programacion y maneho artistico contemporaneo. E organisacion ta wordo acompaña pa un Raad van Toezicht cu ta inclui artista visual contemporaneo sra. Osaira Muyale y gestor cultural sr. Angelo Tromp. E proyectonan ta colaboracionan cu artistanan local, organisacionan cultural y instancianan di arte visual contemporaneo local y e netwerk profesional internacional. Proyectonan den 2019: Arte Contemporaneo den Biblioteca ta un colaboracion cu Biblioteca Nacional Aruba unda ta brinda e comunidad Arubano un coleccion di publicacion relevante tocante arte visual contemporaneo. E proyecto lo ser acompaña pa un serie di eventonan na Biblioteca Nacional (Oranjestad) cu lo toca temanan di e publicacionan den e coleccion.
Pilot program den e Orthopedagogisch Centrum Aruba ta un colaboracion cu OCA unda Fundacion Plataforma Aruba lo desaroya un module pa un grupo di hobennan den e institucion, incorporando arte visual contemporaneo. E proyecto ta un test programma pa investiga metodologianan nobo den e sector di enseñansa y responsabilidad social haciendo uso di arte como vehiculo di comunicacion y expresion.
Pa medio di colaboracionan, Plataforma Aruba ta desea di por contribui na e preservacion di nos herencia cultural actual y apoya e artistanan local, aportando asina na un relacion sano y fuerte entre e sector di arte contemporaneo local y e comunidad di Aruba.

Pa mas informacion:
Fundacion Plataforma Aruba
www.plataformaruba.org
Phone: +297 56318 33
E-mail: [email protected]

Comments

comments