Lansamento di Chelys&Escob y coronacion di Miss Trans Aruba

Riba un anochi den Cage Nightclub, a tuma luga un show di moda cu tawata yena cu creatividad unico cual tawata completamente den man di, e ya bon conoci den mundo di beyeza, Chelis Rocha y amigo/socio Alfredo Escobar. E linea ta hiba nomber di “Chelys&Escob – The New Avantgard”.

Riba e mesun anochi aki Chelis a wordo corona tambe como “Miss Trans Star Aruba” y lo representa nos dushi isla orguyosamente na Barcelona, Spaña, den e concurso “Miss Trans Star International Pageant” cu lo tuma luga den e dianan venidero, caminda un total di 25 pais lo participa. Durante su speech Chelis ta conta cu e ta papia nos dushi idioma papiamento bon bon, ta stima Aruba y, den su mesun palabranan, muy specialmente e ta stima e dushi hendenan.

Nos no por keda sin menciona cu e sala tawata yena cu clientenan fiel, bon amigonan y interesadonan cu a bin pa presencia e bunita show di moda y coronacion. Entre esunnan presente tawata nos beyisima Miss World, Anouk Eman, cu ta duna su completo apoyo na Chelis. E modelonan, cu a presenta e diseñonan, a keda den man di SLV Models y mester bisa cu cada un a resalta cu nan tremendo fisico.

Di parti di masnoticia.com nos ta felicita Chelys&Escob cu e tremendo linea di paña y ta desea Chelis tur clase di exito na Spaña. Trece e corona Aruba!

Comments

comments