Sr. Andin Bikker, minister di Husticia a expresa algun palabranan den presencia di otro autoridadnan di Aruba, na proposito di e conmemoracion di 25 aña di e fundacion di departamento Nacional di Landsrecherche ken ta traha den pro di e comunidad pa mantene e integridad y confianza di e funcionarionan cu ta traha den gobierno.
Landrecherche a cumpli 25 aña. Hopi biaha nos no ta para keto na e hecho cu nos pais ta un democracia hoben, nos tin tur instituto di un pais cu na final di dia, nos tambe ta siñando. Hopi biaha den bida mester no comete e mesun fout pero comete foutnan nobo si, pasobra asina desaroyo lo bin, esaki lo tabata e palabranan di inicio di Sr. Andy Bikker Minister di Husticia di Aruba.
Pa loke ta trata landsrecherche Minister a bisa cu den e aspecto cu gabinete lo ta focus riba dje awor aki lo ta e aspecto di integridad, cu lo ta hopi importante tambe den e programa di gobernacion, y no solamente papia di esaki sino percura pa gabinete ehecuta esaki tambe.
Den e puntonan importante di combati high impact crimes, e di dos pilar lo ta cu gobierno kier bay combati y preveni ta e ondernemende criminaliteit, cu ta nifica crimennan cu ta mina e autoridad den un Estado, unda cu lo por papia di crimen organisa. Pero tambe hopi biaha hende ta lubida cu ora tin crimen organisa e lo ta structura pa loke ta trata falta di integridad den institutonnan, esaki ta contamina e sistema den un gobierno, autoridadnan den un estado.
Integridad lo ta un dimension cu lo ta den desaroyo den actualidad den Reino Hulandes tambe, y gobierno di Aruba lo ripara den nan institucionnan di gobierno, unda cu e foco cada bes lo bin mas riba e integridad y tin casonan andando, aunke porta criminalidad no ta wordo elimina pero gobierno mester keda combati e problematica aki. Y naturalmente Landsrecherche ta un instrumento hopi importante den e tarea aki,s iendo cu ta un di e punto di focus di gabinete y ministerio ta vociferando y lo bay ehecuta.
Finalmente Minister a extende un inmenso felicitacion tambe na un y tur trahado di landsrecherche, a traves di su director sr. Marcel Croes pasobra cu poco recursonan nan a logra desaroya, siendo cu nan lo tin un tarea hopi dificil y cu tin biaha no ta wordo comprendi. Asina mes toch, apesar di esaki nan a sa di desplega trabounan inmenso y hopi profesional unda cu awor aki nan lo por conta cu e recursonan necesario di parti gobierno pa por sigui haci nan trabou den un manera eficiente y ehemplar, segun Minister di Husticia, Sr. mr. Andin Bikker.