Departamento di Landsrecherche a wordo funda pa contribui nan e integridad di e aparato gubernamental di Aruba. El a wordo funda dia 23 Februari, 1993. Sr. Marcel Maduro, director di Landsrecherche ta amplia mas ariba e departamento aki.
Landsrecherche semper a cay bou di Procurador General di Aruba,primeramente nan ta haci investigacion contra di personanan cu forma parti di e aparato gubernamental of cu di un of otro forma ta relaciona cu esaki.
Sr. Marcel Maduro, di Landsrecherche a enfatiza cu nan tin un bon samenwerking, cu Landrecherche di Corsou, St. Maarten, Rijksrecherche y tambe hopi instancianan di Aruba mes tambe y e trahamento hunto ta bay hopi bon. Nan falta ekipo y personal, pero nan tin comprension pa e situacion.
Na comienso di e departamento den su trayectorio di 25 aña, nan tabata traha mas tanto ariba casonan di investigacion chikito, investigacion contra actuacion di polis. Pero mas y mas, e invetigacionnan a cambia pa investigacionnan financiero, hopi mas grandi y complica, cu tabata tin duracion di luna of te hasta varios aña. Den e ultimo añanan aki, e reto mas grandi di Landsrecherche ta pa traha di un manera obhetivo y completamente independiente, segun Sr. Maduro a expresa.
Landsrecherche ta un team chikito cu ta hopi orguyoso di nan trabou, unda nan lo cay den Gobierno, pero nan ta traha pa henter comunidad di Aruba. Por spera di nan integridad, respet, hopi humildad y cu nan a haci nan trabou como debe ser, caminda cu nan lo duna e trato corecto sin distingui, y sin diferencia na tur hende por igual.
Pa ultimo, Sr. Maduro a gradici su coleganan y e pueblo di Aruba pa e 25 aña di existencia di Landsrecherche. Di mes manera e ta gradici tur e organisacion y instancianan cu lo por contribui pa cu esaki, y por ultimo e ta extende un felicitacion na un y tur, e pueblo di Aruba, cu por ta orguyoso di e trabao di Landsrecherche.