Politica, ora cu tabata den parlamento, tabata un otro situacion pa sr. Rudy Lampe cu awor ta un minister, e ta un blanco di critica casi tur ora pa locual ta enseñansa. A puntra e mandatario si tin cierto cosnan ta stroba ora cu bo ta minister pa tuma cierto accionnan of decisionnan, pa por compronde un tiki riba e parti di politica. E mandatario a contesta cu ‘no tin diferencia den e trato cu mi a haya den parlamento y como minister.’ Ora cu e tabata parlamentario, el a wordo acusa di ta pedofil. E mester a bay corte y cana henter un caminda di husticia pa mustra cu esey tabata un acusacion falso, anto el a gana e casonan tambe.
E sushamento di nomber, pa ataka su persona y purba di kibra credibilidad tabata tempo e tabata den parlamento caba, y awor como minister e ta sigui mescos. “Semper partido RED tabata un target pa wordo kibra paso nos ta un menasa pa cierto interesnan, nos ta un partido inovativo cu ta trece cambio den nos sistema politico, y tin cierto interes no ta aprecia esey”, segun sr. Lampe.
Por corda cu ora a perde eleccion, dos partido a bringa sr. Lampe; AVP y MEP, awo e ta sinta cu MEP, anto a campaña cu Cannabis y esaki no a logra te ainda yegando e di tres aña di gobernacion. A puntra kico por spera di esaki yegando final di gobernacion y sr. Lampe a contesta cu ‘akinan nos ta den un situacion unico.’ E ta sigui splica cu ‘nos tin e lider di coalicon sr. Ricardo Croes ta participa den ‘coalitie leiders beraad’, el a pone su firma pasobra como lider di partido RED [vote getter grandi], e ta esun cu ta carga responsabilidad pa loke ta programa di gobernacion.
Cannabis den programa di gobernacion
Un partido politico den nos sitema democratico ta bay eleccion, cu un programa electoral, y RED entre otro a bay cu tema di Cannabis. Despues pueblo a papia. A forma un programa di gobernacion, y Cannabis medicinal a keda den e programa anto mester wordo ehecuta. Akinan bo mester busca un persona den e partido cu lo ehecuta e programa den e ministerio cu a keda asigna. “P’esey ta asina importante pa un partido politico ta serio den su consistencia, principionan y historia. Pasobra momento cu partido RED bisa por ehempel cu no tin confiansa mas den mi persona, mesora mi ta entrega mi retiro. Pasobra ta e partido ta pone bo eynan pa ehecuta un programa di gobernacion cu a wordo negocia”, sr. Lampe ta splica.
E punto di Cannabis medicinal ta aden y ta bay cumpli cu ne segun sr. Lampe, cual ta e responsabilidad cu tin aworaki riba schoudernan di Ricardo Croes.
Sr. Lampe: “Manera sr. Croes a bisa, nos tabata kier esaki tuma luga hopi prome caba, el a bay poco poco y nos en berdad no ta contento di esaki. Pasobra si e la bay cu mas rapidez, awe den e crisis aki nos lo tin un solucion y miho para como pais.”
E mandatario ta bisa cu si tin diferencia den opinion den conseho di minister, y como gobierno ta uno so tin. Esey ta e diferencia den parlamento unda fraccionnan ta expresa nan opinion publicamente. Pero como gobierno y conseho di minister, un pais ta un gobierno e tin. E diferencia di opinion cu tin den conseho di minister ta keda eyden. Pero no pasobra tin diferencia di opinion kiermen cu no tin confiansa mas den un persona.