LOS ANGELES, California – E cantante y strea di pop Mericano, Lady Gaga, a revela na un grupo di hoben di e comunidad LGBT na New York, cu e ta sufri di stress postraumatico (trastorno di ansiedad), despues di a wordo viola tempo e tabata un adolescente di 19 aña.
“Mi propio trauma a yudami compronde e trauma di otro,” e artista a expresa den un entrevista cu e programa di television Mericano “Today Show”, durante un encuentro cu adolescentenan LGBT sin hogar den e Centro Ali Forney di Harlem.
“Mi a bisa na e muchanan ey cu mi ta sufri di un enfermedad mental. Mi ta sufri di stress postraumatico. Nunca mi a bisa esey na un hende, asina ta, ata nos aki,” el a agrega.
Ademas Gaga a confesa publicamente na 2014 cu el a wordo viola y a cost’e shete aña por a conta e hecho di extrema violencia; den su cancion “Til it Happens to You” ta conta su experiencia cu e tabata tin ora el a wordo abusa sexualmente.
Despues di e bishita na e hobennan, e artista a haci un publicacion atrabes di su cuenta riba Twitter: “Awe mi a comparti un di mi secretonan mas profundo cu mundo. E secretonan lo enfermabo y ta bergonsami,”, el a skirbi.
Fuente: NTN24