Tur dia nos por scucha cu den varios bario riba nos dushi isla, cu sea ladronnan ta drenta kibra den auto of nan ta invadi propiedad di hende y bay cu cosnan cu hende ta traha hopi duro pe. Y sa yega asina leu cu hasta ora tin hende na cas, ladronnan tin e durf di cana kibra den scondi y ta bay cu cos di hende.
Aki nos tin algun ehempel
Central ta manda patruya na un adres den Byronstraat pa un caso di ladronicia. Eynan ta papia cu e homber E., kende a declara cu desconocidonan a forsa porta dilanti di su cas y a drenta paden. Nan a bay cu diferente cos. Keho di ladronicia a wordo tuma. Central a wordo poni na altura.
Den un otro noticia, Central ta dirigi patruya direccion Kamay pa un ladronicia. Eynan a papia cu habitante di e cas, yama F., kende a declara cu den careda di 8’or y 15 di anochi, e tabata sinta riba stupi di su cas situa banda pariba di su cas, ora cu el a scucha zonido di algo kibra parti panort di e cas. Ora cu el a bay controla, el a mira cuater homber desconoci direccion panort riba e caminda di Caya Francisco Figaroa, ta core bay. E por a nota cu un bentana di e camber banda panort tabata kibra. E desconocidonan a kibra e bentana banda panort. Departamento tecnico di polis a wordo poni na altura, como tambe central.