Recientemente, ELMAR ta haya su mes continuamente confronta cu un fenomeno preocupante. Ta trata aki di hortamento di wayanan di koper riba e red di coriente di ELMAR den varios bario rond di nos isla. E situacion ta uno sumamente preocupante pa ELMAR ya cu na momento cu nan a keda confronta cu dicho situacion esaki ta trece un interupcion di coriente cu’ne.
Den casonan asina ELMAR ta haci tur su esfuerzo pa re-establece e suministro di coriente mas lihe cu ta posibel pasobra ta compronde e molester cu esaki ta trece cu’ne.
ELMAR ta adverti un y tur riba e peliger cu e practica ilegal aki por ocasiona. E wayanan di koper, tin coriente riba nan cu na momento di mishi cu esaki, lo por tin consecuencianan fatal pa e persona(nan).
Na mes momento pueblo di Aruba mester tene na cuenta cu e ladronicia di koper ta castigabel pa ley, pero mester corda tambe cu e benta y compra di articulonan horta ta haci bo complice na un hecho castigabel.
Finalmente ELMAR ta garantisa pueblo di Aruba cu e fenomeno aki tin tur atencion di e compania pa asina logra pone un fin na e situacion. ELMAR ta pidi un y tur cu por tin cualkier tipo di informacion pa por fabor tuma contacto cu warda di Polis na number 100 of yama ELMAR na 523-7147 of 523-7100.