Ladron ta haya sota formal di bringado di MMA muhe

Un ladron a kere cu tabata facil pa horta un celular for di un mucha muhe den e cuidad di Rio de Janeiro, Brazil. E mucha muhe tabata mustra inocente y fragil loke a haci e ladron pensa cu e trabao lo bay ta facil. E homber a haci manera e tin un pistool den su saco y ataca e mucha muhe pidiendo pa e celular. Pero akinan su number a hunga pasobra tabata trata di e bringado di MMA Polyan Vianna di apenas 26 aña di edad. E homber pues a haya un sota formal di e mucha muhe inocente y fragil aki. Despues di a haya su sota bon mereci, e ladron a wordo deteni pa polis.

“Mi a ripara na dado momento cu e homber a sinta banda dimi. El a puntrami cuantor tin y a keda sinta. Pero ora el a wak mi warda mi celular, el a cuminza menazami pa mi dune e celular”, Polyana a declara. Na e momentonan ey e pesadiya di e ladron a cuminza. E mucha muhe a dal e ladron un par di mokete y ora esaki a cai abao el a skop e ladron tambe un par di biaha. Ora e ladron a keda benta ta keha di dolor, Polyana a pidi esnan eybanda pa jama polis. E mucha muhe a bisa cu e ta kere cu hasta e ladron a keda sorprendi cu el a cabi haya un sota di un mucha muhe y no a move a haci nada mas.

Comments

comments