Willemstad Curacao: Den oranan di mardugá di djadumingu 28 di yüli 2019, alrededor di 02.45’or, polis a tuma nota di dos hòmber ku tabata aktua bastante sospechoso den besindario di un garashi riba Weg Naar Welgelegen.
Mesora e unidat a bai hasi un kontrol i na e momentu ei un di e hòmbernan a move for di e sitio den un outo miéntras polis a detené e sospechoso R.S.M.M. nase na Kòrsou di 27 aña di edat ku a keda atras.
Polis a kuminsá ku un persekushon tras di e outo ku a move for di e sitio i na altura di Plasa Hariri, shofùr di e vehíkulo a bin aksidentá i bòltu.
A detené e hòmber J.F. nase na Kòrsou di 30 aña di edat, pero debí na e heridanan ku el a sufri den e aksidente, el a keda transportá ku ambulans pa poliklínika, unda el a keda interná pa tratamentu médiko.
Den e besindario di e garashi, polis a bin topa algun tayo ku e hòmbernan a pone kla, probablemente pa bai kuné.
A presentá e sospechosonan dilanti di un fiskal ouksiliar ku a ordená nan enkarselamentu pendiente di mas investigashon.