E laborista Keir Starmer, a converti den e Prome Minister nobo di Reino uni, poniendo fin na 14 aña di gobierno conservador den e pais. Rey Charles III a nombr’e oficialmente como hefe di Gobierno den e Palacio di Buckingham.
Den su prome discurso n’e nacion for di 10 Downing Street, Starmer a priminti cu su gobierno lo sirbi tur e Britaniconan y a declara cu e pais mester di “un reinicio mayor.” “Desde awo tin un gobierno no agobia pa doctrina, guia solamente pa determinacion di sirbi su interesnan,” el a afirma, destacando cu un di e fortalesanan mas importante di e nacion Britanico ta su “capacidad pa nabega door di e awanan mas trankil.”
“Sinembargo, esaki ta depende cu e politiconan, specialmente esunnan cu ta defende stabilidad y moderacion, manera ami ta haci, reconoce ki ora nos mester cambia di rumbo,” el a enfatisa, ora el a indica cu tin demasiado tempo ta ignorando “mientras cu miyones di persona tabata cay den un mayor insiguridad.”
E partido Laborista cu 412 asiento, a logra den e eleccionnan general anticipa e mayoria absoluto den House of Commons, mientras cu e Partido Conservador a logra 121 asiento, sigui pa e partido Liberal Democrata, cu 71 asiento. Partido Nacional Escoces (SNP) y e partido Irlandes Sinn Fein a logra 9 y 7 asiento, respectivamente.
Rishi Sunak a acepta su derota y a presenta su retiro, anunciando tambe cu e lo demiti como lider di ‘tories.’ “Ta un dia dificil pero mi ta laga e trabao aki honra di tabata e Prome Minister di e miho pais di mundo,” el a declara den su discurso di despedida.
E eleccion di House of Commons tabata inicialmente premira pa final di januari 2025, sinembargo, el a tuma luga di manera anticipa despues cu Rishi Sunak a dicidi di disolve Parlamento despues di a acorda esaki cu Rey Charles III na mei.
Durante e dia electoral, e votadonan Britanico a scoge 650 miembro di House of Commons, uno pa cada districto electoral local. Pa obtene e mayoria absoluto, un partido mester haya mas cu e mita di e asientonan, es decir, por lo menos 326.