“La Cuadra Venezolana” diadomingo mainta na Cas di Cultura

Skirbi pa Clyde Harms

Diadomingo mainta cuminsando 11or den Cas di Cultura, “La Cuadra Venezolana” lo presenta otro programa resaltante cu e rikesa di musica di nan pais. Cu e presentacion aki e cuarteto lo reenforsa nan fama como interprete di e musica ey y nan popularidad na nos isla.

La Cuadra Venezolana tabata na Aruba na november 2009 bou auspicio di Kunstkring. Nan a haci un nomber pa nan mes cu nan interpretacion di obranan di e compositornan mas popular di Venezuela y America Latino. Como president di Aruba Scholarship Foundation y amigo personal di e cuatro musiconan, mi a propone pa nan duna un concierto na beneficio di e fundacion y nan a ofrece di duna un gratuitamente. Asina La Cuadra Venezolana a bolbe na November 2010 y toca na Renaissance Theatre cu a yena completamente pa recauda miles di florin pa nos studiantenan.

La Cuadra Venezolana ta consisti di Nicaulis Alliey, flauta y picolo. Nicaulis a yega di toca tambe den dos programa di Piano Festival di Armand Simon; Jose Angel Escalona, casa di Nicaulis, ta toca fio y mandolin; Juver Ulacio ta un maestro di cuatro; Miguel Antonio Gonzales ta un bahista, compositor y areglista masha conoci na Venezuela. Nan ta forma e cuatro skinanan di e cuadra cu ta transmiti e vibracionnan nobo. E calidad sublime di nan musica ta refleha e dies añanan cu nan a toca hunto.

Manera mas di dos miyon di nan paisanonan, e cuater musiconan di La Cuadra Venezolana tambe ta forma parti di e diaspora Venezolano. Juver ta biba awor na Bogotá, Colombia; Miguel a establece na Mineapolis, Minnesota mientras cu Nicaulis y José, desde cu Nicaulis a logra su doctorado di musica na Universidad di Nebraska, ta biba na Chicago caminda e grupo a reuni recientemente pa rebiba nan amistad y toca nan piesanan.

E programa di diadomingp ta consisti di tur genero di musica di Venezuela, vals, vals cancion, merengue, danza, tonada, etc. pero tin por lo menos un “jazz fusion” (Made in New York di Tania María). E piesanan individual ta representa inspiracionnan di compositornan famoso manera Simon Diaz (Flor de Mayo, Sabana- Pasaje del olvido), – Lionell Velasco (Juliana) y varios otro.

Ban apoya e bon trabou di Arubaanse Kunstkring! Ban scucha La Cuadra Venezolana diadomingo 21 di october cuminsando 11or den Cas di Cultura. Entrada ta AWG 35.-, pa mucha, AWG 15.-. Miembronan ta paga AWG 35.-. Carchi di entrada ta obtenibel solamente na Cas di Cultura prome cu e concierto. [email protected]

Comments

comments