EAGLE BEACH – La Cabana Beach Resort & Casino ta orguyoso di por anuncia cu el a wordo reconoci cu e premio estimado di AHATA IMPACT AWARD den e categoria di FOSTERING WORKPLACE WELLBEING. E reconocemento aki ta refleha e resort su dedicacion incansabel den loke ta esfuersonan extraordinario di su empleadonan den cultiva un ambiente laboral productivo y ameno.
E premiacion a bini tambe na un momento perfecto pasobra mientras cu a haya sa cu e resort a logra e reconocemento aki, na mes momento General manager, Joe Najjar, Human Resources Director Tessely Koolman y Human Resources Manager, Sudi Guda tabata den Las Vegas atendiendo e Society for Human Resources Management (SHRM) 2023 Conference, enfocando riba cambio y exploracion den strategianan nobo pa fomenta bienestar laboral dentro di e cultura organisacional.
La Cabana Beach Resort & Casino a haci e su prioridad pa enfoca riba e bienestar di e empleadonan, cu e conocemento cu un ambiente laboral positivo ta esencial pa satisfaccion general y exito. Por medio di diferente iniciativa e resort ta duna un ehempel remarkabel pa e industria, adresando diferente aspecto di loke ta bienestar pa empleado.
Salud mental tin un significacion grandi na e resort, y maneho a estableci un sistema extensivo di apoyo pa sigura cu empleadonan tin acceso na tur recurso cu nan mester. Servicionan confidencial di consultacion, tayer pa maneho di stress, hunto cu un cultura di simpatia y comprension ta crea un ambiente na unda cu empleadonan ta sinti nan mes safe papiando tocante nan salud mental.
La Cabana Beach Resort & Casino ta determina pa sostene e crecemento profesional di su empleadonan por medio di ofrece diferente oportunidad pa desaroyo di carera y programanan di training. Por medio di inverti den abilidadnan y conocemento, e resort ta empodera su empleadonan pa avansa nan mes personalmente y profesionalmente, resultando den e forma aki pa tin aumento den satisfaccion laboral y bienestar general di tur hende.
Reconociendo e importancia den e balans entre bida y trabao, La Cabana Beach Resort & Casino ta brinda areglonan laboral flexibel, time-off paga, y otro areglonan teniendo cuenta cu e famia. E resort ta haya cu ora empleadonan por tin un bon harmonia entre nan bida profesional y personal, nan ta bay dilanti. E compromiso aki ta permiti nan pa mantene un balans saludabel pa asina cumpli cu nan compromisonan personal cu hopi mas facilidad.
E resort su programa excepcional di reconocemento ta reconoce y premia su empleadonan riba nan logronan, creando asina un ambiente laboral hopi mas positivo cu ta engrandece e moral y bienestar general. Gerencia ta para firme cu aprecio ta fomenta un sentido di cumplimento y ta motiva empleadonan pa sigui haci nan best.
AHATA IMPACT AWARD ta un testimonio na e logronan excepcional di La Cabana Beach Resort & Casino y su compromiso na crea un ambiente na unda empleadonan ta sinti nan mes balora, sosteni, y motiva. Por medio di diferente iniciativa, e resort a haci un impacto positivo den e bida di su empleadonan, dunando fruto na un cultura organisacional vibrante y exitoso.
Un pabien ta bay na henter e famia di La Cabana Beach Resort & Casino pa e reconocemento aki bon mereci. E resort lo sigui na pone prioridad den e bienestar di su empleadonan pa continua na sostene e balornan cu a yuda na logra e honor prestigioso aki.