Recientemente un truck yena cu articulo di donacion a yega na Huize Maris Stella, mescos cu a tuma luga riba Dia di Tata, ora La Cabana Beach Resort & Casino e trece cuminda, brasa y sonrisa pa e 160 habitantenan y miembronan di staff, na e cas di anciano situa na Savaneta.
Na Juni, mas o menos 10 empleado di e resort, hunto cu Director di Food and Beverage Pierre Kock, a yuda sirbi cuminda y desea e habitantenan un dushi fin di siman di Dia di Tata. E tabata un oportunidad positivo pa papia y conecta cu e ancianonan, kendenan a yama bon bini na e bishitantenan y en berdad a disfruta di e cuminda y e bishita.
“Nos ta sumamente conciente di nos responsabilidadnan social,” Pierre Kock a bisa na e momento ey, “y ta dedica recursonan y energia na sirbi nos huespetnan, nos asociadonan y nos comunidad. Sirbiendo lunch na e cas di anciano,” el a agrega,” tabata un experiencia sumamente agradable, y nos tin planea di ripiti esaki, lagando e habitantenan anciano sa cu nan no a wordo lubida.”
Kock a keda fiel na su palabra. E regalonan di e siman aki, acepta na Huize Maris Stella pa Merita Tjou-Tam Sin, gerente di e sitio, y su ekipo, a inclui 17 TV cu remote control y bracket, 30 cortina, 110 cusinchi y 40 klechi di cama, tur tabata articulonan djis un tiki uza, pero den bon condicion, cual a haci e cas contento cu e colaboracion util y e cuido cu e habitantenan anciano a ricibi y merece!
E cas a duna un danki di curason na e resort pa tur esnan cu a bini hunto pa haci e proyecto comunitario excelente aki un realidad.