California, MERCA- Roger Federer diabierna a pasa pa e semi final di e Masters di Indian Wells, sin cu el a hunga . Su contricante den e kwart final, Nick Kyrgios a retira for di e torneo, door di malesa.
Segun e Australiano, e tabata lanta henter e anochi, presuntamente door di intoxicacion. “Spera cu e no ta algo mas grave cu esey”, Kyrgios a scirbi riba su cuenta di Twitter.
“Mi mester ta fit pa por gana un campeon manera Federer. No ta un decision facil, esakinan ta torneonan pa cual mi a train hopi duro pa nan, pero simplemente mi no ta fit pa hunga”.
E ronda anterior ainda Kyrgios tabata sorpresivamente demasiado fuerte pa e Serbio Novak Djokovic.
Federer ta cuatro biaha campeon di e prestigioso torneo aki di Indian Wells. El a gana na 2004, 2005, 2006 y 2012.