Koningin Wilhelminafonds ta preparando un actividad grandi pa tuma luga den luna di augustus. Tur aña e fundacion tin su tradicional recaudamento di fondo. Sin embargo COVID-19 a stroba nan den 2020 pa cual nan a cay atras den e fondonan, pero nan trabounan pa e pashentnan di Cancer sigui a sigui normal.
Kedando den e normal nobo, KWF ta organisa un BINGO Virtual cual lo tuma luga dia 6 di augustus awo pa 7’or di anochi. Entrada di e Bingo aki ta necesario pa e fundacion por sigui brinda ayudo na e pashentnan di cancer, sigui duna nan e sosten den momentonan dificil.
Presidente di e fundacion Lillian Prince a splica cu un di e ayudonan mas grandi cu nan a brinda ta esun na cas. E ta un servicio completamente gratis pa e pashent y ta haya esaki tur dia di siman, y tambe riba dianan di fiesta.
Di experencia nan por bisa cu e gastonan di servicio na cas di juli pa november semper ta menos cu e otro lunanan. Nan gasto pa brinda e servicio na e pashentnan ta 20 florin pa ora y den fin di siman e ta 30 florin. E ta un gasto cu ta core pa cuenta di e fundacion. Otro gasto halto cu nan tin ta esnan di protesis cu ya caba a haci un bestelling. Esaki ta un gasto cu no ta baha bou di 10 mil florin. Transporte ta otro gasto cu a subi basta ultimo tempo.
Algo positivo ta cu Aruba a haya su propio departamento di Radiologia, pa cual e pashentnan no mester biaha mas pa exterior. Pues tur pashent ta haya nan tratamento aki na Aruba mes y no tin e gasto pa e compañante cu tin biaha KWF ta yuda cu ne. Ademas, di e forma aki e pashent ta haya su tratamento di un forma mas trankil.
Pa por cubri nan gastonan cu a keda vigente, a dicidi di recauda fondo via di un Bingo. Cada ticket ta costa 10 florin y ta bini cu 10 wega, cu premionan atractivo. Tambe tin e posibilidad pa cumpra un paki di 50 aden, colaborando di e forma aki cu e fundacion.
Ta pasa e Bingo via di canal 48. Pa mas informacion, por tuma contacto cu KWF.