Presidente di Camara di Comercio, Sr. Ernst Mohamed, ta elabora tocante e anochi di reunion cu Aruba Chamber of Commerce & Industry lo tene cu tur comerciante di Aruba riba 5 di September pa scucha nan preocupacionnan pa cu nan propio negoshi.
Sr. Mohamed ta splica cu nan ta hayando hopi reaccion di preocupacion y frustracion di locual ta pasando. Nan kier tende riba un plataforma mas amplio kico ta pasando den comercio di Aruba. Pa nan por defende, dialoga, y traha cu Gobierno un tiki mas fuerte, e ta importante pa nan acomula mas informacion. Nan sa cu tin hopi topico riba mesa manera ROPV, Serlimar, Hospital y BBO, pero porta tin otro topiconan cu comerciantenan mediano y chiktio ta confrontando y como directiva a opta pa haci un reunion estilo “town hall meeting” cu e comerciantenan aki pa determina exactamente kico nan preocupacionnan. Sr. Mohamed ta remarca cu esaki no ta un reunion politico, sino un forma pa nan ta al tanto di e situacion di e comerciantenan.
Nan ta bay actualisa e documento di Camara pa nan presenta esaki e aña aki atrobe na Gobernador, Gabinete y Staten. Tur miembro di directiva lo ta presente na e reunion cu lo ta den aire liber. Sr. Mohamed ta mustra cu ta importante pa comerciantenan ta presente e anochi aki, pasobra esaki ta un ocasion unda nan por vocifera tur nan preocupacionnan. Camara di Comercio ta sintando cu diferente Minister cu mas frecuencia y nan kier trece esaki mas dilanti p’asina yuda nan den nan maneho di Gobierno pa locual ta comercio. Comercio ta e cliente mas grandi di Gobierno y nan kier haci tur cos posibel pa haci e negoshinan mas trankil.
Por ultimo, Sr. Mohamed ta enfatisa cu e meta di e reunion aki ta pa scucha e preocupacionnan di tur comerciante en bes di scucha nan separa. Nan sa bon di e problemanan cu tin, sin embargo, semper tin cosnan nobo of cosnan cu nan tin pruebanan directo cu nan por vocifera p’asina defende nan ora di sinta cu diferente instancia. Y den cuater siman nan lo pidi un reunion cu Gabinete y Staten pa elabora tocante e situacion den un reunion special.