A base di dato di registracion di negoshi Camara di Comercio y industria di Aruba (KvK) ta contruibi na presenta e desaroyonan comercial di Aruba. E registracion ta duna un indicacion di con fertil e mercado local ta y con un comerciante ta mira y probecha di oportunidadnan comercial cu por surgi. Nos ta den aña di eleccion y KvK kier trece dilanti un comparacion di e desaroyo di registracion di negoshi durante e periodo aki. Esaki ta sigur interesante mirando e desaroyonan cu ta tuma luga rond di esaki y e influencia cu e tin riba e registro y cancelacion di negoshi.
Situacion na 2013
E tabata un sla duro pa e economia di Aruba ora cu Valero a cera su porta na 2012. E importacion di fuel oil y gasolin pa uso domestico, combina cu caida den export di producto di petroleo a causa menos entrada pa pais Aruba. Economia di Aruba a bira hopi mas dependiente di turismo. A pesar di caida di inversionnan y exportacion, e sector di turismo a logra impulsa e expansion di economia di Aruba na 2013. E situacion a keda delicado pasobra Aruba ta depende grandemente di un solo pilar economico.
Situacion 4 aña despues
Nos ta 4 aña mas leu awo y ta aña di eleccion. Nos por observa un situacion diferente na 2013 caminda cu awo nos por bisa ta creando un pilar economico den forma di e upgrader di Citgo. Preparacionnan ta andando y expectativanan ta halto pa mira kico esaki lo trece cune. Comercio no ta para keto y tambe ta reacciona riba e desaroyonan aki.
Ora nos observa e fluho di registracion di 2013 compara cu 2017 nos por wak cu 2013 a mira un fluho modera durante aña te cu augustus pero cu Juni y Juli como e lunanan caminda tabata tin mas hopi registracion di negoshi nobo. 2017 na su lugar a cuminsa cu prome kwartal cu relativamente hopi mas registracion pa despues baha y mira un crecemento leve pero sin surpasa e cantidad di registracion di e prome kwartal di 2017. Pa 2013 tin un total di 914 negoshi registra y 2017 tin 917 negoshi registra over e mesun periodo di Januari te cu Augustus.
Cancelacion den registro di negoshi pa 2013 ta mustra cu segun ta acercando dia di eleccion tin mas cancelacion tumando luga. 2017 tin un fluho diferente y por mira menos cancelacion di negoshi registra segun ta asercando e fecha di eleccion 2017. 2013 tabatin un total di 561 cancelacion y 2017 tin 461 cancelacion registra over e mes periodo di Januari te cu augustus. Den cancelacion si por nota un diferencia mas grandi entre e 2 añanan menciona.
Cambio den perspectivanan economico desde april
E cambio den perspectivanan economico despues di high season turistico di mita di aña, y e posponemento di start di refineria ta posibel factornan cu ta un influencia riba e bahada di registracion. Nos por mira cu esaki a cay pa yega punto mas abou na april cu 100 registracion y despues a mantene y subi levemente te 118 registracion durante luna di Augustus 2017. E caida ta cuadra cu observacion di CBA cu a indica cu e confiansa ta menos y tambe nos tin efecto di aña di eleccion.
Di negoshinan cu a registra di Januari te cu Augustus di 2017, 482 ta di entidad legal eenmanszaak, 268 VBA, 127 NV, 9 VOF, 2 AVV y 27 ta otro tipo. Comparando cu e mesun periodo di aña anterior nos por indica cu tin mas registracion a tuma luga den 2017 compara cu 2016. Durante e periodo aki tin registra pa 2016, 454 eenmanszaak, 235 VBA y 129 NV.
Mas registracion nobo den 2017
Den su totalidad, ora cu compara e periodo di Januari te cu Augustus di 2017 cu e añanan anterior, por observa cu e ta fluctua hopi y cu 2017 tin te awo mas registracion di negoshi (917) compara cu ultimo 5 añanan. Durante 2012 despues cu Valero a cera su portanan, hopi ta esnan cu a opta pa lanta nan propio negoshi. Esaki a haci cu na 2013 tin un crecemento significante compara cu 2012. Mester remarca cu aña 2013 tambe tabata aña di eleccion. Cuminsamento di 2017 e posibilidad di un refineria tambe ta un factor mirando cu hopi negoshi cu a registra durante e prome mita di 2017 ta di e sector di construccion of contratista. Expectativanan tabata halto te ora cu a ser anuncia cu e refineria su apertura lo bay tuma mas tempo.
Den un observacion anterior di e registracion nos a trece dilanti cu januari 2017 a compensa pa e caida na final di 2016 te cu december 2016 y a mustra un crecemento significante pa loke ta trata registracion di negoshi cerca KvK. Esaki a contruibi cu na 2017 tin un record di registracion compara cu añanan anterior.
Pa loke ta trata cancelacion di e registro nos ta observa cu tin 318 eenmanszaak, 71 NV, 46 AVV, 14 VBA, 5 VOF y 7 otro tipo di forma huridico.
Comparando cu e mesun periodo di aña anterior nos por wak cu tin mas cancelacion a tuma luga den 2017 compara cu 2016 unda tin 304 cu ta eenmanszaak, 87 NV, VBA 21 y 24 AVV. E tipo Eenmanszaak ta keda esun cu mayoria di cancelacion pero AVV tin 22 mas cancelacion compara cu mesun periodo di 2016.
Te cu mita di 2017 nos por saca for di registro cu e sectornan cu tin mas registracion ta e sector di construccion/contratista sigui pa marketing, consulting y servicionan relata na recurso humano.