Diarason mainta a tuma luga un conferencia di prensa yama pa polis y kustwacht pa splica riba entrada di hendenan ilegal.
Sr. Paskel di Kustwacht a splica cu pa 2’or di marduga, a haci deteccion di un boto cu ta wordo considera como sospechoso y a bay haci un investigacion. Ora cu a bay pa intercepta e boto, ya caba tabata yegando tera y a logra di pone man riba e dje, mientras cu e tabata saliendo bek for di nos costanan den e area di Mangel Halto/Santo Largo. E ora ey a cuminsa un buskeda masal den cooperacion cu KPA, den e area di Santo Largo/Mangel Halto y esey a resulta den captura te awor aki di 9 persona, excluyendo e capitan. E capitan ta e di dies persona cu a wordo captura. E boto a wordo confisca. E capitan ta wordo interoga na e momentonan aki na warda di polis San Nicolas, den cuadro di sospecho di transporte ilegal di hende (mensensmokkel). Por a remarca tambe e cooperacion cu a bin di inmediato, despues cu e melding a drenta, pa cera af e luga. E area unda cu e bahamento aki a tuma luga y esey a conduci tambe na captura di e ilegalnan. Tambe tabata tin inzet di helicopter, cu a yuda tremendamente den localisa e hendenan den e area aki. Ta un area dificil pa busca hende, entre e mangelnan. Door di bista for di e den aire, e buskeda tabata mas efectivo, unda cu e hendenan a wordo captura den e proceso.
Te awor aki no tin e confirmacion riba tur nacionalidad di e hendenan. Gran mayoria ta Venezolano, pero no por bisa si tur ta. Te awor aki ta trata aki di hende homber. No ta descarta tampoco cu tin mas hende den e area, den e mangelnan scondi. Esey, e coleganan ta na e sitio ainda, buscando e area pa percura cu no a skip ningun hende.
Tabata tin diferente declaracion contradictorio, e ora ey pa ta sigur cu no a laga ningun hende atras, ta bay inverti algun ora mas den cooperacion cu polis pa percura cu e area ta bon ristra.
E boto mes a wordo detecta via radar. Ta trata aki di un solo boto. A haya e ayudo for di Corsou. E helicopter a bin y a haci su search y a yuda den captura di algun hende. Pero e helicopter ta limita tambe na su fuel capacity cu e tin. Tambe limita na inzet verder durante di e dia. E ayudo di helicopter a tuma luga y tabata hopi valioso tambe.
Tin e area di Mangel Halto-Santo Largo, cubri awor aki. Lo keda busca te na momento cu ta sigur cu no tin ningun hende mas.
Tin campistanan na e mesun luga aki. Paskel ta pidi esnan cu ta campando, pa yuda. Mester di ayudo di comunidad den combatimento di entradanan di ilegal entre otro. Tin e number di alarma via centrale post y kustwacht mes cu ta 913, haci e yamada manera cu movecionnan straño wordo mira na costa, pa asina haci e trabao un tiki mas efectivo tambe.
Mirando e situacion na Venezuela, a puntra Paskel si nan lo pone extra atencion y lo traha hunto cu e otro islanan. El a splica cu ta algo cu ta bin ta haciendo pa basta aña. E situacion berdad ta birando mas preocupante na Venezuela, pero en todo caso na Aruba, den combinacion cu e partnernan manera Polis, Douane, Imigracion, Warda nos Costa, tur e dienstnan cu tin di haber cu frontera, ta den un cooperacion hopi estrecho cu otro, pa contraresta cualkier movecion cu por bin for di Venezuela.
A puntra Paskel con alerta nos hendenan cu ta campando mester ta den e dianan aki, banda di lama.
Por yama e number di polis straight 100, y tambe number di kustwacht, si ta trata botonan riba lama, cu ta 913, caminda cu kustwacht ta wordo informa, caminda cu nan ta zet in di biaha nan unidadnan.
Kustwacht ta enfoca rond di Aruba. No tin un punto specifico. Importante ta e costa completo di Aruba, segun Paskel.
Pa loke ta trata combersacion cu e hendenan ta wordo treci, ta tuma luga.
E helicopter a keda mas of menos casi 2 ora den e area, segun Paskel. Te asina leu, den e caso aki, ta bay over di hendenan indocumenta cu a wordo haya te awor aki. No tin papia di droga of arma.
Vocero di Polis, Llito Lacle a splica riba e caso aki y kico ta e pasonan cu polis lo bay tuma. E ta conta cu e capitan den pasado, a haya 3 aña di casino. Mensensmokkel ta wordo castiga basta severo na Aruba. Awor aki nan ta wordo interoga. Mas hopi cu saca for di nan, ta miho pa no solamente pa e investigacion, pero pa por haya sa kico ta pasando na Venezuela y for di cua punto nan ta saliendo.
Mas informacion por haya, ta mas por informa riba cierto strategianan.
Lacle a splica, na Kustwacht, tur shift, dos colega ta envolvi cu kustwacht. E cooperacion ta tremendo. No por lubida e trahadonan di K9 di KIA cu a yuda den e buskeda aki. Nan di biaha a reacciona y a bay duna un man cu e buskeda aki.
Riba e situacion na Venezuela, tin combersacionnan andando pa fula tera y pa wak kico ta pasando, pa mira ki medidanan mester tuma aki na Aruba.
Lacle a splica cu loke Aruba tin cu percura pe y tambe Antias, pa zorg pa cera nos costanan mas hopi posibel. Tin mas control posibel pa no haci’e faborabel pa ilegalnan no bin Aruba, Corsou of islanan di Antias.
Por yama 100 of 913 libremente. Lo percura pa reacciona mas pronto posibel. Cuerpo Policial, den temporada di Semana Santa, tur districto a upscale nan sterkte, di manera cu nan por reacciona na tempo riba tera y tambe coleganan di Kustwacht pa nan por reacciona mas lihe posibel riba lama, Lacle a splica por ultimo.