Diahuebs ultimo, dilanti di costa y den lama rond di Aruba, a controla intensivamente riba embarcacion for y pa Aruba. Stationship Zr.Ms. Van Amstel, cual ta opera bao di e bandera di Kustwacht Caribisch Gebied, hunto cu Cutter Panter y demas unidadnan di Kustwacht cu punto di sosten Aruba, a aborda y revisa botonan local pa actividadnan iregular y ilegal. Door di esey unidadnan di kustwacht riba lama, sosteni pa Kustwacht aereo for di HATO, entre cual, e avion di patruya DASH-8 y AW 139 helicopter. Tambe desde e stationschip patruyanan a wordo efectua cu NH-90, e helicopter di e barco. Durante e accion aki, kustwacht tabata tin cooperacion estrecho di Douane, Maritieme Politie, Imigracion y Directie Scheepvaart Aruba.
Durane e accion aki, a drenta melding cu un buceador a bira malo durante duikmento cerca di e rif di Barcadera. Helicopter di kustwacht, AW 139 y tambe un embarcacion di Maritieme Politie, hunto a wordo poni den accion pa asina duna asistencia. Eynan, miembronan di tripulacion di kustwacht y tambe maritiem politie a bay abordo di e embarcacion di e scol di buceo, kendenan ya tabata tin e buceador abordo. Eynan e buceador a haya prome auxilio y e embarcacion a wordo guia pa Barcadera, caminda cu e buceador a wordo tuma pa personal di ambulance cu tabata para ta warda.
Riba un di e embarcacionnan controla, a haya un arma di candela. Esaki a wordo confisca inmediatamente. Tur participante por a mira bek na un bon cooperacion entre e partnernan caminda cu a tene controlnan severo riba embarcacionnan, como tambe documento y carga.
E patruyanan intesivo y controlnan riba embarcacion ta wordo efectua pa Kustwacht pa asina combati comercio y transporte di droga, arma y personanan ilegal.