Willemstad Curacao: Kustwacht Caribish Gebied (KWCARIB) a detene durante e anochi di dialuna, 22 pa diamars, 23 di Augustus, un embarcacion cu dos Venezolano. Nan ta wordo sospecha di a trece hendenan ilegal na tera.
Dialuna anochi, rond di mey anochi, e radaroperator di e Centro di Rescate y Coordinacion di Kustwacht a detecta un contacto sospechoso via radar zuidoost di Corsou. Un unidad cu tabata na e momento ey cu tabata patruyando na costa zuidwest, a wordo pidi inmediatamente. Mas of menos un miya y mey zuid di Jan Thielbaai, nan a bin haya un embarcacion sin luz tipo Yola cu tabata nabegando parti zuid. Nan a wordo para di biaha, pero nan no a duna oido. A tuma luga un persecucion, caminda cu e Yola den un corto tempo a wordo intercepta. E dos personanan a purba di laga e boto zink, pero door di e maniobra rapido di un di e personalnan di kustwacht, cu a bula abordo, esaki por a wordo evita. E Yola yama “Genesis Jose” a wordo treci na punto di sosten Parera. Ambos tripulante tabata di nacionalidad Venezolano y a wordo pasa pa polis, cu tin e caso aki, hunto cu Kustwacht, bao di un investigacion.