Kurt Thomas ta postula su mes pa President di AVB den e proximo eleccion di Arubaaanse Voetbalbond cu lo tuma lugar juli venidero.
“ Mi ta desea di informa bo persona, cu tur confiansa y transparencia, cu mi lo postula mi mes pa President di AVB pa e proximo eleccion den juli venidero”, tabata palabranan cu Kurt Thomas a usa diasabra mainta pa informa e comunidad di futbol di su decision.
Kurt Thomas a hunga di edad hoben pa e organisacion di futbol ASV River Plate y tambe tabata entrenador y vice-president di ASV River Plate.
Cu 8 aña di experiencia como miembro di directiva ehecutivo di AVB, hopi aña di experiencia den futbol y cu hopi experiencia den e mundo di enseñansa/educacion, tambe inovacion/digitalisacion den enseñansa na nivel nacional y internacional, Kurt Thomas ta mira e futuro di AVB como un organisacion esencial pa nos comunidad di Aruba tresiendo e respet y confiansa bek den futbol. E respet y confiansa aki no ta solamente den e deporte di futbol pero tambe pa un y tur cu ta juda den e desaroyo di e deporte di futbol na Aruba.
“ E focus ta mucho hopi ariba AVB y ainda falta pa focus mas ariba e hendenan, participantenan, stakeholders cu ta traha den background pa juda e deporte di futbol na Aruba.”
Sr. Thomas a bin ta señala e punto menciona aki di hopi aña pasa caba. Den e proximo simannan, lo splika mas extenso ariba e motivacion y motibo den cuadro di e postulacion di sr. Thomas como President di AVB den juli venidero.