Den un celebracion ameno na e compania di auto Yrausqiun a anuncia e flota nobo pa patruya policial y departamento di trafico y polis na frontera.
Den presencia di minister di Husticia y Asuntonan Social Sr.Rocco Tjon, altocomisario di Polis drs. Ramon Arnhem, mando policial y gerencia di Yrausquin a haci e acto simbolico aki.
Cuerpo Policial Aruba lo bay ricibi patruyanan policial nobo di e marca FORD modelo Everest y Ranger. E escogencia aki a bin despues cu un comision di polis a organisa y a investiga y test drive algun auto pa e flota nobo. Conhuntamente cu Ministerio di Husticia e trabounan pa escoge e flota nobo a bay lihe y e recomendacion a cay pa e dicho marca aki y di e forma aki Yrausquin ta gana e destaho publico.
Ademas di esaki Cuerpo Policial Aruba tambe lo ricibi un flota nobo di vehiculo pa departamento di recherche y personal administrativo.
“Inverti den nos hendenan, tecnologia y material y crea un sentido di seguridad pa nos comunidad y nos agentennan. Cuerpo Policial Aruba ta den desaroyo positivo pa asina crea un base solido pa e futuro di KPA”. Tabata palabranan di altocomisario Arnhem hopi satisfecho cu otro logro mas pa bienestar di KPA y e seguridad di Pais Aruba.
Alabez esaki lo ta prome biaha den historia di Aruba cu no ta solamente patruya policial y sofistica lo wordo ricibi den e flota nobo aki pero tambe “Data Terminals”. KPA ta sigui innova cu tecnologia, cada un vehículo lo ricibi computer den auto pa asina facilita e agentenan cu nan trabou diario y di e forma aki avansa den tecnologia. Di e forma aki Aruba ta dal un stap grandi locual ta tecnologia y husticia.
Pronto e vehículo nobo nan aki ultimo modelo lo subi riba nos carteranan cu e colornan di nos bandera blauw cu su strepinan geel cu orguyosamente nos ta carga tur dia.
