Willemstad – Gobièrnu di Kòrsou a tuma nota ku ta sirkulando den medionan di komunikashon e notisia ku Kòrsou lo partisipá mañan djaluna 4 di febrüari den e esfuerso humanitario internashonal pa ku Venezuela. Gobièrnu ke informá komunidat ku Kòrsou ni Reino no ta na altura di ningun yudansa humanitario pa Venezuela via teritorio di Kòrsou.
Gobièrnu a yega di indiká ku e ta dispuesto pa fungi komo un hub pa yudansa humanitario pa pueblo di Venezuela komo pais bisiña, pero pa loke ta trata e akshon di mañan Kòrsou ni Reino no ta forma parti di dje.
Manera anteriormente indiká Gobièrnu ta keda vigilá e situashon na Venezuela i lo informá komunidat debidamente a traves di e medionan di komunikashon di Gobièrnu.