Hopi tabata e kehonan den comunidad tambe den caudro cu desaroyonan den ultimo fin di siman, riba con Polis a baha riba hende y trato cu hende a ricibi ora di control. Segun Korpschef Vanessa Tjon-Kock, pa Cuerpo Policial esaki tambe ta un periodo hopi dificil. “No lubida, bo tin e parti di orden publico, pero keto bay nos ta den un crisis”, e ta bisa. Korpschef ta sigui na splica cu e tareanan cu Cuepo Policial tin na momentonan aki pa cu e crisis, ta basta amplio. “Mi ta compronde berdad cu por ta e conducta di Polis na e momento ey cu e tin cu bay trata e persona, por ta no ta tur hende ta contento cu esaki. Pero p’esey mi ta purba splica cu bo grado di tolerancia no por ta grandi mas tampoco”, segun sra. Tjon-Kock.
Cuerpo Policial a sinta cu diferente grupo pa yega na diferente acuerdo pa cu protocol, maneho y tur loke por tin pasando no solamente den establecimentonan nocturno, pero tambe pa otro procesonan.
“Mi ta compronde cu economia di Aruba tin cu sigui draai, nos tin cu sigui sali, y no por keda aña aden y afo cu medida. Pero nos ta den un crisis, anto esey ta loke hopi hende ta lubida, tin medida y tin cu mantene nos mes na e reglanan”, sra. Tjon-Kock ta bisa.
Cuerpo Policial su tarea ta pa e reglanan aki wordo cumpli y p’esey hopi biaha bo lo haya cu e actuacion di miembro policial no ta bay ta esun semper di mas agradabel.
“Si mester actua man duro, bo ta actua. E momento ey bo ta autoridad y bo tin cu bay tene cuenta cu loke bo ta bezig ta controla y e respet mester t’ey. Bo tin cu biba cu e medidanan cu a wordo stipula cu e momento ey ta Cuerpo Policial ta esun cu ta encarga cu e control, esey ta algo cu berdad no ta tur hende den comunidad ta compronde esaki y ta accepta esaki, unabes mas, e ta un situacion dificil pa miembronan di Cuerpo mes, cu no tin cu solamente haya nan mes cu agresion pero tambe insulto, pero di otro banda e ta nan trabao,” sra. Tjon-Kock ta splica.
Polis ta haci un suplica na doñonan di establecimento, y comunidad general, no solamente pa nos traha riba nos comportacion pasobra e ta conta pa cada un di nos, mirando cu ketobay nos ta den un crisis. Si nos comportacion no cambia, nos lo haya nos automaticamente cu nos por yega na otro tipo di medidanan y esaki ta algo cu sigur ningun di nos na Aruba kier den temporadanan di fiesta, segun declaracionnan final di Korpschef ayera durante un rueda di prensa.