Na e momento aki Koningin Wilhelminafonds ta haya cu casonan di cancer di pecho ta tiki alarmante. Si mira cu tin 42 siman di e aña aki y den e 42 simannan aki, a presenta na KWF cu 30 dama cu a wordo opera di cancer di pecho, caminda cu mester a kita e pecho afo. Sin conta tur esnan cu a wordo opera caminda cu nan a kita un parti y toch keda pecho, pero un tiki mas chikito cu e otro y despues di añas, ta bin ripare, segun Lily Prins, representante di e fundacion.
Ta bin un yamada grandi di KWF pa tur dama na Aruba, siña conoce bo pechonan. Siña conoce bo curpa. Bo no mester tin miedo y si por tin algo y dokter a bisabo, por fabor, acudi cerca e specialista. Si bo wordo atendi na tempo, bo tin un chens, pero si bo no acudi na tempo e ta doloroso pa sa cu e ta bira fastioso pa e tratamento despues. Pesey KWF ta pone enfasis, mirando con awor aki apenas 42 siman, faltando 10 siman mas pa 52 siman di un aña pasa, den 42 siman, ta haya un total cu a presenta na KWF 30 caso. Esey ta un yamada cu ta haci na tur dama aki na Aruba. Na e momento cu bo wordo yama pa bo haci bo mamogram, acudi. Si bo a bay caba dos aña pasa pa haci mamogram y ainda no a haya bo invitacion, papia cu bo dokter y percura pa bo haci’e. Mas tempran esaki wordo detecta, menos dolor e ta causa. E no ta dolor pabo so. Corda riba tur esnan cu tin rond dibo. Por ta bo mama, por ta bo rumannan, por ta bo casa, por ta bo yiunan. No causa nan e dolor di pone man na bo cara y no enfrenta e realidad. Pasobra esnan cu ta keda atras, ta keda cu un dolor grandi, segun Prins. Pesey ta pidi un biaha mas, un suplica na tur dama y no ta keda cerca damanan so. Ta bay cerca e cabayeronan tambe. Pasobra cabayeronan tambe ta haya cancer di pecho.