Awe, diabierna 7 di October cuminsando pa 7pm na e MFA nobo di Paradera, lo tuma luga e lansamento di e buki “Un Arubiano Na Libia”.
Skirbi pa Clyde Harms, e buki ta un coleccion di su memorianan di e añanan 1966-1973 cu el a traha cu ESSO na Tripoli. Un Arubiano na Libia a wordo publica danki na cofinanciamento di UNOCA y tur ganashi di benta lo bay pa Koningin Wilhelmina Fonds (Aruba), e fundacion cu ta yuda preveni y combati cancer.
Ta pidi un donacion di Afls 50 na KWF pa cada ehemplar. Sra. Lilly Prince, President di KWF y e autor lo autografia tur buki cumpra na e evento historico. E buki tin caft bunita y duro y e ta contene mas di 140 potret. E ta educatico; e ta lesa facil y agradabel. Algun di e storianan ta hopi conmovedor y tur ta trece aspectonan interesante padilanti.
Como cu e ingreso di benta ta destina pa yuda e victimanan di cancer y nan famia, Koningin Wilhelmina Fonds y e autor a prefera di no gasta placa pa brindis. Nan ta sigur cu tur hende lo bay di acuerdo cu e decision aki. Esnan cu kier bebe algo lo por cumpra tur clase di refresco na prijsnan rasonabel di e concesionario cu lo ta habri te ora e evento caba.
E MFA centro di bario Paradera ta keda band’i panort di e caretera pa Santa Cruz na un distancia di 300 meter pariba di e rotonde di Paradera. E ta un prenda di edificio.
Ban duna sosten na e actual y futuro victimanan di cancer na Aruba y nan famia! Ban yuda Koningin Wilhelmina Fonds preveni y combati cancer na nos isla. Ban Paradera awe nochi y cumpra e buki “Un Arubiano na Libia”, pa nos mes y pa regala nos famia y amigonan.