Diabierna 7 di October Koningin Wilhelmina Fonds (Aruba) a lansa e buki “Un Arubiano na Libia” skirbi pa Clyde Harms. E buki ta un coleccion di storia di su añanan 1966-1973 cu Esso na Tripoli. Mescos cu e dos otro bukinan di e autor, “Un Arubiano na Libia” tin kaft duro y ta contene hopi potret, e ta educativo y ta lesa facil. Atrobe Irene Peterson a logra un joya cu su trabou di redaccion. Danki na e cofinanciamento di UNOCA, e buki a wordo imprimi na Colombia.
Pa e anochi ey e autor a prepara un bunita exposicion di foto y artefacto di Libia cu a hala masha atencion y evoka curiosidad di esnan presente. Especialmente e pida palo cu a bira piedra (petrified wood) y e sand stone (santo cu a bira piedra) tabata suheto di varios pregunta na e autor.
Sra. Lilly Prince, Presidente di KWF a habri e anochi gradiciendo tur e instancianan cu a yuda haci e publicacion un realidad. E tabatin palabranan special pa e autor pa su regalo generoso na e fundacion. Tur ganashi riba benta di e buki ta bay pa e fundacion! Sra. Prince a lista e hopi maneranan cu KWF ta yuda e victimanan di cancer y nan famia y el a duna un idea ta cuanto esaki ta costa. Ta pesey el a urgi comunidad di Aruba pa cumpra un ehemplar pa yuda KWF.
E autor a gradici tur esnan cu a yud’e den su proyecto: E corantnan cu a publica e storianan,
dos Papiamentologo cu a haci e “spelcheck” gratuitamente como contribucion na KWF, Sr Ito Tromp y Sra. Maureen Molina – Luydens. Harms tambe a gradici Sr. Brian Marchena di PrintMedia pa su ayudo gratuito ki ora cu e autor tabatin mester di un “hard copy” di e buki; UNOCA cu a co-financia e publicacion, Irene Peterson pa su redaccion sublime y Nathaly Harms – Ellis, directora di Unoca kende tabata un asesor importante pa e autor.
E autor a duna suficiente detaye riba algun capitulo pa lanta e curiosidad di esnan presente pa conoce e contenido di e buki. E autor tambe a urgi pueblo Arubiano pa cumpra e buki pa yuda e fundacion tan respeta den nos comunidad. KWF ta yuda no solamente esnan cu tin e mala suerte di bira victima di cancer, pero tambe nan famia.
E personanan encarga cu MFA Paradera ta supremamente servicial, cariñoso y comprometi pa haci e edificio un exito completo. MFA Paradera ta un edificio impresionante y bunita, pero e no ta sirbi pa un evento manera lansamento di un buki. E acustico ta teribel. Y como den e piso ariba tabatin un otro evento caminda e hendenan tabata combersa, hopi biaha tabata imposibel pa sigui e discursonan di e lansamento.
E organisadornan tabata hopi desapunta cu e concurencia chikito. Dia cu nan a scoge di tene e evento na Paradera, luga di tene na Playa manera ta costumber, nan a kere cu e lo atrae hendenan di e bario ey mes y e luganan rond manera Piedra Plat, Sero Blanco, Casibari y otro, specialmente pasobra e evento lo a duna nan un chens di sera conoci cu e edificio di nochi. Cu excepcion di un amigo di e autor, no tabatin ningun persona di e bario cu a asisti e evento e anochi ey. Ni uno! Tres aña pasa cu UNOCA a lansa e buki di e mes autor, “Storianan di un Mucha di Lagoen”, riba e brug di Lagoen na final di Zoutmanstraat, tabatin mas di 150 hende y mas di 76 buki a wordo bendi. Siman pasa tabatin menos di 76 persona presente y nan a cumpra 34 buki. Naturalmente, esaki no ta fin di mundo. KWF y e autor tin planea pa tene sesion di firma y bende e buki den tur skina di Aruba. Keda pendiente di anuncionan den prensa y rednan social. Entre tanto, bo por cumpra e buki na UNOCA y na oficina di Koningin Wilhelmina Fonds den Spinozastraat patras di watertoren di Playa. Tambe bo por contacta e autor libermente na [email protected] of na 738-8843 pa ordo un of mas ehemplar cu e lo autografia cu hopi placer. E prijs ta un donacion di Afls 50.00 na KWF. Y tur ganashi ta bay pa KWF!! Please yuda KWF yuda e victimanan di cancer y nan famia!