E agencia di modelo mas renombra di nos region lo tin un casting diaranson dia 14 di Juni proximo pa asina mira hobennan masculino y femenino cu ta interesa pa forma parti di e elenco di modelonan profesional cu e agencia ta representa. E casting lo tuma luga na TRASH Store caminda lo mira tur cu a registra pa asina selecciona kendenan e agencia kier representa. “KOMA ta un model agency, no un instituto di modelahe, ta pa e motibo aki nos agencia ta kies kendenan nos kier representa. Na Aruba modelahe ta mas bien un hobby y ta yuda cu e desaroyo social y auto-estima di hobennan” ta locual Ronchi De Cuba, presidente di KOMA MODELS a duna di conoce. E agencia ta responsabel pa descubri, prepara y lansa e miho modelonan di nos pais. E caranan mas conoci den modelahe, pa foto of pasarela, ta pertenece na KOMA MODELS. Actualmente e agencia e restructura su website y a dicidi di busca algun cara nobo pa representa. “Nos ta buscando hobennan cu un fisico atractivo y cu un personalidad amical. Modelahe no solamente ta encera good looks pero tambe un great personality cu bon manera,” Ronchi ta continua bisando. E agencia, estableci na 1989, a sa di presenta e eventonan mas grandi di moda di nos pais. Un y tur cu ta interesa ta keda invita pa inscribi, sin ningun costo, na TRASH Store pa asina forma parti di e casting nacional di KOMA MODELS. Pa mira mas di e agencia por bishita nan website komamodels.com of bay ariba nan pagina di facebook KOMAMODELS.