Tabata un siman bastante tenso pa Caribe Hulandes, despues cu Madre Patria a pone condicionnan bastante estricto pa por sigui fia nos placa pa por sobrebibi e Covidcrisis cu nos ta bibando. Aki ta unda paisnan autonomo den Reino Hulandes a dicidi, practicamente den blok, cu no ta tuma e ofrecimento di Hulanda sin mas y a tuma avion rumbo Madre Patria.
Paisnan autonomo di Caribe Hulandes ta di opinion cu e condicionnan cu Hulanda a pone pa por sigui fia placa, ta demasiado pisa y ta hasta mina nos autonomia den Reino. Maske cu Gobiernonan di Sint Maarten, Corsou y Aruba no tabata por a revela e contenido di e documento cu Hulanda a manda dialuna, nan a no a duda den vocifera nan mal contento pa Hulanda su proceder.
Durante su conferencia di Diabierna, Secretario di Estado Raymond Knops, a duna di conoce cu e situacion financiero di e islanan Caribense ta bastante precario y e Covidcrisis a revela e situacion real di cada isla. Maske cu den caso di Aruba cosnan ta diferente, toch nos pais a conoce un aumento drastico di nos debe nacional den e ultimo 8 añanan. Y aki ta unda diferente reaccion a cuminsa sali for di tur skina cu hendenan bisando cu ta Gobierno di MEP y AVP a crea e caos financiero cu Aruba ta aden.
Pero si sigui scucha Secretario di Estado, Raymond Knops, su declaracion, e ta continua bisando cu e Gobierno actual tabata bayendo den un bon caminda pa sanea Aruba su situacion financiero y tabata logrando. Pero lastimamente Covidcrisis a bati na nos porta y nos situacion a cambia drasticamente den poco tempo.
Mas cla Secretario di Estado Knops no por tabata ta: Gabinetenan Mike Eman 1 & 2 a causa un desaster financiero pa Aruba. Dus, cu otro palabra, sr. Knops den nomber di Hulanda a duna Gobernacionnan bou encargo di sr. Mike Eman, un “dikke onvoldoende” pa nan maneho di nos pais. Gobernacion anterior a redobla nos debe nacional y hinca nos pais den un situacion caotico y hunto cu e Covidcrisis aki, a crea e “perfect storm” pa pone nos pais na merced di Hulanda.
Mientras cu di banda di Partido AVP no a scucha ainda un defensa pa cu e declaracionnan di Secretario di Estado Hulandes, Pueblo di Aruba mes ta formulando su propio opinion riba loke aworaki no tin manera mas pa defende: Aruba su autonomia a cuminsa wordo entrega na momento cu a malgasta placa den e añanan di AVP su gobernacion.