Riba diadiomingo 4 di juli, den e ballroom di Aruba Marriott Resort & Stellaris Casino, Colegio Nigel Matthew, antes Colegio San Nicolas, a celebra nan graduacion di Havo Class of 2021.
Durante e anochi placentero aki den presencia di mayornan y famia, Minister Demisionario di Enseñansa Rudy Lampe, mandatarionan, inspectornan, docentenan, ondersteunend personeel y beleidsmedewerkers, 74 alumno a gradua.
Aunke e aña’ki tawata tin diferente reto, entre otro e pandemia di Covid 19, e studiantenan a sa di supera esaki y a logra nan meta final den gran forma. Nan a colabora cu otro, haya sosten di docente y consehero, fiha riba nan meta y na final a cosecha exito. Varios alumno a scoge pa sigui nan estudio den exterior y algun a scoge pa sigui nan studio na Aruba mes.
E miho graduado den 8 materia ta Kiyani Silvania. E miho graduado den 7 materia ta Nashmaila Fullinck. Ambos alumno tin un cijferlijst excepcional y a ricibi un bunita gesto di Caribbean Mercantile Bank.
Colegio Nigel Matthew su tradicion ta pa honra tambe e miho graduado pa cada materia:
Nederlands: Kelisha Burke, Geschiedenis: Kelisha Burke, Engels: Francis Coppin, Spaans: Francis Coppin, Papiamento: Jechnaya Croes, Biologie: Kiyani Silvania, Scheikunde: Kiyani Silvania, Natuurkunde: Chieh Tien Cao, Aardrijkskunde: Arianne Nauta, Wiskunde A: Arianne Nauta, Wiskunde B: Sem Thodé, Informatica: Zachary Mila, CKV: Ariadna Perdomo, Bedrijfseconomie: NasmailaFullinck, Economie: Steven Chen.
Management Team Sr. Samuel Dumfries y Sra. Robin-Ann Didder, cuerpo di docente y cuerpo di sosten di Colegio Nigel Matthew kier a felicita tur alumno cu nan gran logro y ta desea nan tur clase di exito den nan siguiente etapa.
