Ya pa di 8 aña consecutivo e club di servicio Kiwanis Club of Young Professionals (KYPA) ta organisando su famoso projecto conoci como “ Christmas in a Box” unda cu ta colecta comestibles pa esnan den necesidad. Pa haci esaki posibel, KYPA lo ta e fin di siman aki dia 24 y 25 di November desde 10or di mainta te cu 6or di atardi na entrada di Super Food Plaza pa asina ricibi tur donation di nos comunidad pa hunto nos por haci e projecto aki uno exitoso un biaha mas. E meta e aña aki un biaha mas ta pa por crea 100 basket pa asina duna bek na famianan cu tin mester di dje, specialmente den e dianan di fiesta nos dilanti. Kiwanis en general tin como meta pa sirbi e muchanan den nos comunidad y e basket nan aki ta bai pa famianan por alegra tur mucha nan fin di aña un poco mas.
Durante e 8 añanan aki sigur e projecto aki a sa di crese y bira mas grandi aña pa aña, na unda e comunidad di Aruba ta contribui por medio di comparti productonan di prome necesidad p.e. lechi di bleki, hariña, cornflakes, cuminda di bleki, y berdura di bleki. Aña pasa a logra crea 111 basket y asina aki haci cu 111 famia por tabata tin un mihor fin di aña. Tur persona, organisacion y compania cu kier contribui na e accion aki ‘Christmas in a Box’. Por tuma contacto cu KYPA via e-mail: [email protected] y tambe via nan Facebook Page “Kiwanis Club of Young Professionals Aruba”. Pa finalisa KYPA kier gradici comunidad en general y tambe tur comerciante, pa sostene e proyecto aki tur aña y asina hunto nos por yuda nos muchanan tin un fin di aña mas alegre.