E di 25 Masquerade Party di Kiwanis Club of Parlm Beach lo tuma luga dia 9 di februari proximo, den Renaissance Convention Center. Esaki a wordo anuncia durante un conferencia di prensa cu e Club Social a organisa.
Kiwanis Club of Palm Beach ta un service club cu e aña aki lo celebra su di 40 aña di existencia y cu ta yuda cu varios proyecto den comunidad.
Pa por corda, proyecto cu nan tin ta entre otro Childseat project, Back to School project, Stima mi Guia mi, Terrific Kids, cu ta proyecto cu durante hopi aña ta yudando comunidad di Aruba.
Danki n’e Masquerade Ball cu 100% di e fondonan recauda e anochi ey, ta bay pa yuda e proyectonan na Aruba. Ta p’esey ta pidi semper sosten di pueblo pa yuda e club pa contribui pa cumpra un carchi for di e miembronan pa atende n’e fiesta.
P’e celebracion di e 25 aña tin algo special prepara, esta un sorpresa p’e anochi.
Segun Gilmar ‘Cheito’ Croes kende ta e chairman pa loke t’e organisacion di e Kiwanis Masquerade Party, nan ta hopi entusiasma p’e organisacion di e di 25 edicion di e fiesta aki.
Tin hopi rason pa celebra e anochi aki riba dia 9 di januari. E fiesta lo cuminsa pa 9:30 pm te cu 2:30 am, riba e diabierna di e fin di siman grandi di Carnaval.
Manera ta custumber, esaki ta un di e poco fiestanan of si no t’e unico fiesta di disfraz cu tin rib’e isla y loke ta hacie special, ta pone enfasis grandi riba e bandanan local cu ta participa.
Un biaha mas lo bay tin cuater banda musical riba e anochi aki cu lo ta Robert Jeand’or y su Solo Banda Show, N’Fuzion, Tsunami y Buleria.
E cuater bandanan aki lo ta cla pa duna un tremendo show manera cu semper nan a haci. Loke ta hopi bon di tur banda cu participa durante e anochi aki, nan no solamente ta haci un tremendo presentacion, pero ta full prepara p’e anochi aki.
Nan ta bin cu set cu no ta haya ningun caminda, cu ta durante e fiesta aki.
Fuera di esey lo tin diferente doorprize y premio pa disfraz. Mester menciona cu lo pone un extra enfasis riba e premio pa disfraz. Hunto tin entre 60 y 70 premio, caminda cu sigur ta 40 di e total premionan, lo wordo aloca n’e disfraznan.
Tin diferente categoria, cual ta individual, duo, grupo, comico, esun elegante, fantasia y asina por sigui.
Naturalmente pidi e publico encaredicamente p aprepara e disfraz, no solamente p’e fiesta riba su mes, pero naturalmente tin chens pa gana un bunita premio.
Loke tambe ta haci e fiesta apart ta cu tin e ticket cu ta 500 florin pa dos persona. Esey ta inclui tur cos. Naturalmente e entrada, cuater banda musical, premium snacks, cual tin di bisa cu hasta ta cambiando di loke nan tabat aparti e añanan anterior y sin lubida e premium open bar cu ta hisa di nivel.
E cartera por lag’e trankilamente na cas. Na final di dia, e causa t’esun mas importante y ta pasa un anochi inolvidabel, ameno, sigur, den bon compania, bon entertainment, bon sorpresa, pa un bon causa.
