Dialuna ultimo, januari 30, 2023, Kiwanis Club of Palm Beach a
haci entrega di awards na Colegio San Hose. E entregamento di awards a tuma lugar na
Colegio San Hose hunto cu e alumnonan y docentenan den cuadro di e proyecto
“Terrific Kids”.
President Daniel Aguirre hunto cu e miembronan Ben King y tambe Frank Hoevertsz, a
entrega e award pa letra R cu ta para pa “Responsabel”. Terrific kids ta un proyecto di
reconosemento na nos alumnonan pa promove desaroyo den caracter, autoestima y
perseverancia. TERRIFIC ta para pa Thoughtful, Enthusiastic, Respectful, Responsible,
Inclusive, Friendly, Inquisitive, and Capable.
Alumnonan ta traha hunto cu nan docentenan pa establece y ehecuta metanan relaciona
cu mehoracion riba conducta, relacion cu otro alumnonan, asistencia na scol, of trabou
na scol. Tur mucha cu termina y logra e metanan aki, ta wordo reconosi como un
“Terrific Kid”, esta un mucha fantastico.
Kiwanis Club of Palm Beach a cuminsa e programa aki den e aña Kiwanistico 2012-
2013. E programa aki a cuminsa na Dominicus College y a expande pa St. Fransiscus
college y tambe Colegio San Hose. Banda di e programa Terrific Kids, tambe nos ta sera
e aña escolar cu e programa Terrific Teacher na cada scol. Esaki ta parti di e aprecio y
respet cu nos tin pa cada docente.
Kiwanis Club of Palm Beach no por a sera e dia sin felicita y entrega un award tambe na
Colegio San Hose den cuadro di su 83 aña di existencia. Di parti di Kiwanis Club of
Palm Beach un pabien na Colegio San Hose y sigui cu e bon trabou pa nos comunidad.
Kiwanis Palm Beach ta forma parti na e organizacion global “Kiwanis International” cu
ta un instancia caritativo dedica na servicio na comunida cu e obhetivo principal pa haci
nos mundo mihor door di cambia un comunidad pa medio di un mucha cada bez. Mas
informacion por haya riba: www.facebook.com/kiwanispalmbeacharuba of
www.kiwanis.org