Den un cena special den e elegante ballroom di Hyatt Aruba Regency e miembronan di Kiwanis Club of Aruba a bini hunto pa celebra y brinda pa e inicio di un aña nobo. Durante e cena Presidente di Kiwanis Club of Aruba, Norma Brinkenberg Spellen, a gradici tur e miembronan pa nan tempo, dedicacion y amor incondicional duna na e club y e comunidad di Aruba. A para keto y reflexiona riba e prome tres lunanan di e aña Kiwanistico 2017-2018 y proyectonan cu a wordo realisa; Kiwanis Hands On day, Celebracion dia Universal di Derecho di Mucha, proyecto di Pasco di Division 26 pa recauda fondo pa Fundacion Ban Uni Man pa Cria Nos Muchanan, Pasco den Bario y Pasco na Casa Cuna.
Como tambe e donacionan cu a wordo haci na e instancianan; Casa Cuna, Fundacion pa Hende Muhe den Dificultad y Red Cross cu ta eherce diferente trabou beneficioso den nos comunidad. Awendia no ta facil pa mantene un fundacion riba pia y ta exigi hopi tempo, esfuerso y dedicacion pa por logra e metanan. P’esey mes Kiwanis Club of Aruba ta haya sumamente importante pa aprecia y duna sosten na e fundacionnan aki, p’asina nan sigui eherce e trabou debidamente, cu na final ta na bienestar di nos propio muchanan.
Presidente di Kiwanis Club of Aruba a duna un muestra di aprecio na e miembronan cu a sobresali den e prome tres lunanan di e aña Kiwanistico. Un momento sumamente special di e anochi tabata e momento cu Presidente saliente di Kiwanis Club of Aruba, Aurora Dijkhoff, a wordo sorpresa cu un muestra di aprecia pa e logro como “Distinguished Recognition Status”, cu Kiwanis Club of Aruba a ricibi pa e aña Kiwanistico 2016-2017, cual tabata un aña sumamente exitoso pa e club. E reconocimento aki ta ortoga pa District Kiwanis International y asina Aurora Dijkhoff ta bira e prome presidente femenino di Kiwanis na Aruba cu ta bira Distinguished President. E anochi tabata un ameno, cu toke carnavalesco y e entrenimiento tabata den nan man di Metropolis.