Kiwanis Club of Aruba ta reconoce e top studiantenan di Colegio Arubano

Diasabra ultimo na Caribbean Cinemas a tuma luga Kiwanis Club of Aruba su di 25 evento anual “Clint Whitfield Outstanding Student Award” pa e studiantenan di Colegio Arubano cu a sobresali den e aña escolar 2020 – 2021.

E reconocemento ta wordo organisa den e feliz memoria di defunto Clint Whitfield, cu a funda Kiwanis Club of Aruba na aña 1965 y a fungi como e prome presidente di e club. Señor Whitfield a traha cu un amor, pasion y dedicacion grandi pa e bienestar di nos comunidad y cu hopi orguyo Kiwanis Club of Aruba ta honr’e pa 25 aña largo cu e club su proyecto anual “Clint Whitfield Outstanding Student Awards.”

E top studiantenan di cada aña a wordo reconoci pa nan nivel escolar excelente den presencia di nan sernan keri, y tambe den presencia di Distinguished Past Governor di Kiwanis International señor Robert “Bob” Spellen, Rector di Colegio Arubano señor Tim Croes, Secretaria di Fundacion Clinton Whitfield Dr. Joyce Pereira, Presidente Elegi di Kiwanis Club of Aruba señor Jokoeza Hooplot y tambe e miembronan di e club encarga e evento annual, incluyendo señor Ebby Schwengle cu a fungi como e maestro di ceremonia.

E siguiente studiantenan a ricibi nan “Clint Whitfield Outstanding Student Award” pa e aña escolar 2020 – 2021:

  • Ciclo Basico 1: Evie van der Sloot
  • Ciclo Basico 1: Angelyn Davila Puentes
  • Ciclo Basico 2: Elizabeth Vrolijk
  • Ciclo Basico 2: Mariajose Salazar Salazar
  • HAVO 3: Naysa Rojas
  • HAVO 4: Gijs Fidler
  • HAVO 5: Mendy Liang (best geslaagde)
  • VWO 3: Clinton Roga
  • VWO 4: Ryvic Simon
  • VWO 5: Charissa Laing
  • VWO 6: Nicolle Vigil Munoz (best geslaagde)

 

Durante e ceremonia, e studiantenan a ricibi un certificado hunto cu un goodie bag yena cu diferente regalo pa disfruta di dje. Na final di e evento, nan a ricibi e oportunidad pa saca potret cu nan sernan keri por medio di un photobooth, y nan a ricibi nan potretnan geprint pa asina keda cu un bunita recuerdo di e evento y nan logro.

Kiwanis Club of Aruba un bes mas kier felicita e studiantenan cu nan “award” y ta spera cu esaki por ta un motivacion pa tur hoben pa kere den nan mesun potencial. Alabes e club tambe kier felicita e mayornan y maestronan di e studiantenan, cu seguramente tabata tin un rol motivacional y educacional. E sintimento di orguyo pa nan yiu of studiante mester ta inmenso. Finalmente, Kiwanis Club of Aruba ta desea pa gradici Caribbean Cinemas, Wendy’s Aruba,

Mini Sweets Aruba, Fundacion Clinton Whitfield, Colegio Arubano, Insta Photobooth Aruba y tur esnan envolvi den e proyecto aki pa nan excelente cooperacion y dedicacion.

Comments

comments