Diasabra ultimo, Kiwanis Club of Aruba a finalisa su proyecto anual “Bon Bista” cu a tuma luga riba cada diasabra den luna di Mei. E proyecto aki su enfoke ta pa yuda muchanan di menos recurso tin bon cuido di bista, y asina por tambe ta exitoso na scol. Hopi mucha ta wordo perhudica den nan enseñansa pa falta di bon bista. Kiwanis Club of Aruba hunto cu Aruba Vision Center ta percura pa e muchanan aki haya chekeo di bista y bril si ta necesario.
Riba tres diasabra, Kiwanis Club of Aruba a busca e muchanan aki den bus y a trece nan Superfood unda a duna nan un bon desayuno patrocina pa Subway Aruba. Despues a hiba cada grupo Aruba Vision Center na Superfood Plaza y asina a check nan bista. Un total di 50 mucha a participa den e proyecto aki y di esakinan 16 tabata tin mester di bril y lo ricibi esaki riba 20 di Mei, 2017. Tambe tin mucha cu a wordo referi pa un dokter di wowo pa chekeo mas profundo.
Kiwanis Club of Aruba kier gradici Subway Aruba, Aruba Vision Center, Aruba Medical Supplies y Superfood pa tur e bon colaboracion y sosten.
Kiwanis ta un organisacion global di voluntario dedica na cambia mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba. Tambe por bishita e website di Kiwanis Internacional na www.kiwanis.org.