For di comienso di otro aña dos kiosco nobo lo bay duna servicio na turistanan cu ta bishita nos playanan. E contratista a entrega e proyecto.
Ta trata aki di dos kiosconan na Eagle Beach, na altura di Chalet Suisse y banda di Costa Linda. Ambos localidad a wordo scogi pa autoridadnan gubernamental concerni, considerando diferente aspecto incluyendo areanan unda mayoria di turista ta aglomera. Freman Construction & Maintenance NV ta e contratista cu a construi e kiosconan, cu ta representa un inversion di casi 753.000 florin.
Ambos edificio tin un bar cu lo bende cuminda y bebida, dos baño, dos toilet cu ta inclui facilidad pa personanan cu limitacion fisico y e posibilidad pa cambia bruki di baby, facilidad pa cambia paña, haci uso di ‘douche’ y ‘lockers’.
Tambe a sigura cu e facilidadnan ta accesibel pa esnan cu desabilidad fisico.
E idea ta pa brinda servicio na turistanan, particularmente esnan bishitando nos isla cu barco crucero y asina tambe maneha e fluho di bishitante cu ta bishita nos playanan. Esaki ta entre otro sigura cu e areanan hotelero no ta yena dimas y cu bishitante nan ‘stay-over’ por disfruta di area di hotel y esnan di barco por scoge den Eagle Beach, Arashi, Nikky Beach, y Baby Beach entre otro. Tur esakinan ta conta cu facilidadnan haciendo e mas atractivo pa bishita. Claro cu esaki ta tambe dirigi na nos comunidad local cu por haci uzo di e facilidadnan na Eagle Beach entrante februari di 2017.
Aruba Tourism Authority ta sumamente gradecido pa e bon cooperacion cu Ministerio di Turismo, DIP, DOW, y Freman Construction & Maintenance NV y otro partidonan envolvi den ehecucion exitoso di e proyecto importante aki cu tin como meta mehoracion di calidad di Aruba su producto turistico.