Kimberly Maduro a wordo scogi door di Starbucks Aruba pa representa Aruba su tres sucursalnan druk, na e evento anual di Starbucks Barista Championship, Latino America y Caribe, cu a tuma luga na Bogota, Colombia recientemente. E dama hoben y inteligente di 24 aña, Kimberly ta trahando na e café na Seaport Marketplace ya pa mas o menos tres aña.
Kimberly no a desapunta su coleganan na Colombia. El a logra di gana contra mayoria di su competidornan pa logra e di dos luga drentando e final, batayando maestronan di koffie di e region y baristanan profesional, saliendo cu e apron tan codicia cu lo confirma pa semper su status como un Barista Campeon di Starbucks.
E ta corda ainda ora cu el a solicita pa trabou na Starbucks, siguiendo e sugerencia di su mama, y ora cu el a wordo acepta inmediatamente, el a reciproca cu gran entusiasmo, siñando tur e proceduranan den solamente dos siman, y enfrentando e bar di koffie y su sin fin di opcionnan y variacionnan manera un profesional for di e cuminsamento.
E experiencia na Colombia, el a bisa, como un invitado di Starbucks, ta un evento cu a cambia su bida. Mientras cu prome cu esaki e tabata apasiona pa tur loke ta trata koffie, awo cu el a mira e fruta su desaroyo compleho di un mata chikito pa un kopi delicioso di koffie, e ta mas cu impresiona y ta aprecia mas e esfuerso y dedicacion cu ta wordo hinca den cada un di e 400 bebidanan special cu ta wordo sirbi na e café tur dia.
Na Colombia, e diescinco baristanan invita tambe a pasa un tiki tempo riba un Finca cu ta sirbi como un plantacion di koffie, unda nan a participa den e bida di e campesinonan, siñando mas tocante e complexidad di cosecha un boonchi superbon cu lo ofrece e experiencia di bebe koffie cu bishitantenan di Starbucks ta merece.
Kimberly ta splica cu nunca e lo lubida e campesinonan humilde y dedica cu el a conoce, y e lesnan cu nan a siñ’e tocante perseverancia y tenacidad. Nan storia a resona den dje, ya cu, como un mama soltera cu tambe ta bay scol, su di tres aña di MAVO, e tin plania pa sigui pa HAVO, cuidando su yiu, trahando y studiando, cu e mesun determinacion.
Mientras cu e ta kere berdaderamente den e ciencia di koffie, e ta combina esaki cu e pasion di un berdadero barista. E ta e actitud cu bo ta inverti den dje, el a bisa, semper e mester ta perfecto, cayente of friu, elabora of simple, e ta dunami un satisfaccion inmenso. Como barista, el a bisa, ta e pasion pa koffie cu ta uni nos.