Diamars dia 15 di October pa 5:30 pm lo tin un evento publico na biblioteca unda historiador di arte Ana Maria Hernandez lo duna un introduccion na kico Performance Art ta. E evento lo wordo acompaña door di un live performance especial y charla cu artista local Natusha Croes. Esaki ta pa tur cu ta curioso pa haya sa kico esaki ta. Publico ta bonbini na biblioteca na Playa. Den historia, arte visual semper a crece y evoluciona door di artistanan cu a pusha e limitenan y a busca maneranan nobo di expresion. Un di e desaroyonan mas importante den arte visual contemporaneo ta Performance Art. Den Performance Art, e artista ta haci uso di su curpa manera instrumento di expresion. Plataforma Aruba a invita artista visual local Natusha Croes comparti un obra cu e comunidad di Aruba y papia mas tocante e rol cu performance art ta hunga den su practica artistico. E evento aki ta un iniciativa di Plataforma Aruba y ta forma parti di e proyecto Arte Contemporaneo den Biblioteca y ta wordo realisa cu e sosten di UNOCA. Plataforma Aruba ta un fundacion non-profit cu ta desaroya actividad y proyectonan pa e comunidad Arubano. E proyectonan ta combina arte visual contemporaneo y enseñansa y ta colaboracionan entre e sector cultural local y internacional.