Durante encuentro den sala di Parlamento cu minister di Husticia unda el a duna informacion riba su maneho pa loke ta trata medidanan contra entrada di ilegalnan, controlnan fronteriso y cooperacion entre e instancianan local y marina, lider di fraccion di POR, Marisol Lopez-Tromp, tabatin diferente pregunta pa e mandatario. Ta trata aki di preguntanan cu a wordo presenta basa riba e sentimentonan y preocupacionnan cu ta reina den pueblo.
Un di e preguntanan ta si ta cuantifica e efecto di e cambio di maneho a largo tempo, no solamente pa e 4 añanan di un minister, pero pa mas largo, su efectonan riba e diferente areanan.
Den e mesun cuadro a puntra si ora ta bin cu un maneho nobo e ta keda solamente como maneho of ta ancre den un ley pa por ehempel e caso di permisonan di estadia. Esaki ta un preocupacion cu ta reina entre nos hendenan unda cu ta mustra cu ta mas facil den forma di ehempel pa un persona cu ta ilegal na nos isla bin na remarca pa keda biba akinan ora e sali na estado y haya baby, cu e ta pa un profesional cu cualidadnan specifico cu kier traha na Aruba y cu un compania mester di dje. “Mi pregunta ta ken ta ‘toets’e maneho cu ta permiti cierto personanan yega mas facil na e permiso di estadia? Cua departamento? Si ta DIMAS so of si tin otronan envolvi? Con ta establece e laso unico aki y kico ta e criterionan cu mester cumpli cu nan pa bin na remarca y con e procedura aki ta den practica?”
Teniendo na cuenta esaki, Lopez-Tromp ta puntra kico ta e maneho, vision y meta cu kier yega na dje no pa e proximo 4 añanan, pero pa un termino mas largo. “Kico nos kier importa? Kico nos kier haci di Aruba? Algun hende ta pensa cu nos ta importando pobresa, nos ta facilitando e entrada di esunnan cu kisas en berdad ta bin pa un miho futuro, pero no ta stimulando suficientemente esunnan cu ta kader of cu kisas tin un contribucion substancial di conocemento pa nos comunidad”.
Den pasado tabatin gruponan cu tabata haya prioridad pa cu nan permiso, por ehempel esunnan cu ta bin traha na hospital of na hotel. P’esey “mi kier sa si a amplia e parti aki di academico of universitario pa tur compania cu ta buscando un hende por ehempel HBO of mas halto sin cu nan tin cu warda un aña of e ta solamente pa cierto gruponan den comunidad ainda?”
Otro pregunta ta si tin datonan riba e efecto riba salubridad relaciona cu entrada y estadia di ilegalnan na nos isla, no solamente den caso di enfermedad of accidente, pero tambe ora nan ta drenta sin por ehempel e vacunanan corespondiente, creando un posibel peliger pa salud.
Igualmente Marisol Lopez-Tromp a puntra riba e cantidad di casonan di personanan cu ta wordo deporta, inclusive algun cu a hasta mata un persona na nos isla, y toch ta drenta pasobra nan a namora y ta casa. “Cuanto caso tin asina y si no tin un lista manera otro paisnan tin cu ta bisa cu si un persona stranhero comete un delito grave e no lo por drenta e pais ey bek? Con e ta pa Aruba na e momentonan aki? Ta asina normal cu a kita bida di un persona, conmove henter un comunidad y toch drenta pasobra a casa? Aruba ta un pais chikito y mi kier sa si e ta asina usual y con ta wak e posibilidadnan pa remedia esaki?”
Riba e parti di acuerdo di convivencia e parlamentaria di POR a puntra cuanto caso tin di parehanan cu ta firma esaki na notario pa evita deportacion mirando cu e mandatario di Husticia a indica cu ta reduciendo esaki. Tambe e ta puntra dicon en bes di reduci e practica aki no ta pone un paro na dje.