Kibra e taboe: implementa medida preventivo y educacion sexual obligatorio

0

Rond di 250 melding ta drenta via Bureau Sostenemi of Directie Voogdijraad pa aña y segun e organisacionnan aki y e otronan, desde 2015 tin un aumento di e cantidad di melding cu ta drenta, particularmente e melding di abuso sexual. Asina Parlamentario Sue-Ann Ras (MEP) ta bisa den un comunicado. Ras ta mustra cu na 2001 Aruba a firma e ‘Internationaal Verdrag inzake de Rechten van het Kind’ (IVRK), unda a compromete na garantisa y protega e derechonan di mucha a traves di diverso articulo describi den e tratado na un manera mas completo posibel. Mester remarca cu Aruba, Corsou y St. Maarten ta e unico paisnan den e region Caribense, unda cu castigo fisico ta prohibi den tur entorno, incluso hogar. E ley di 2016 na Aruba a introduci un cambio den e Codigo di Procedimento Civil, cu ta afirma cu e criansa y e cuido di un mucha no mester inclui negligencia y cu e mayornan no mester aplica violencia fisico of psicologico, castigo corporal of otro tratamento degradante.

RAPPORT UNICEF 2013
“Gobierno anterior y sigur algun parlamentario actual di oposicion, ta vociferando constantemente cu nan no ta wak e trabounan relaciona cu Crisis Plan Social y ta cuestiona nos situacion social alarmante”, Ras a sigui bisa. Pero for di analisis di situacion 2011-2012 cu UNICEF su oficina regional pa Latino America y region Caribense a haci, a conclui y a presenta e resultado na e gobierno anterior na 2013, cu a pesar di e inversionnan social di gobierno y e progreso devastador, no a logra cumpli cu e normanan internacional di derecho humano y riba e tereno di Millenium Development Goals United Nations (MDG). Ademas ta existi varios problema social, economico, politico y cultura, cu ta afecta e derechonan di mucha y ta pone den riesgo tambe e hende muhernan riba nos isla. “No ta existi un sistema di proteccion general pa mucha y hoben, cu ta coordina e diverso servicionan di atencion di manera eficiente y integra y cu base di un legislacion specifico pa mucha y hoben y un sistema di husticia hubenil”, segun Ras.
Actualmente ta trahando riba tur e aspectonan negativo y dificil, cu e rapport di UNICEF 2013 y esun di awo a indica, cu tambe ta relaciona cu e rapport di Anne Hofman, pa asina por aplica e leynan y maneho adecua pa loke ta trata e topico aki.
“Imagina cu 80% di e casonan di abuso sexual, ta trata incest. Kemen nos problema principal no ta ley, sino e actitud cu mester cambia pa crea conscientisacion. Segun e organisacionnan den veld social, comunidad di Aruba actualmente ta den un fase transitorio di discuti y ta consciente di ofensa sexual (zedendelicten). Tin hopi atencion pa ofensa sexual, unda taboe ta un obstruccion, pa participa na e medidanan preventivo, señala y haci declaracion (aangifte) relaciona cu ofensa sexual”, Ras a indica.

4 MOTIBO
Segun un investigacion di Anne Hofman tin 4 motibo pa taboe na Aruba.
Miedo: Tin un falta di confiansa den e organisacionnan, unda cu e storianan negativo tocante e procesonan di straf y straf abou pa e depredadornan, ta fortifica e miedo. Tambe e menasa ‘het afschrikken van de politie’ y e miedo pa papia tocante esaki, ta hunga un rol.
Berguensa: Esaki ta bin door di e falta di anonimidad, e atencion di prensa y door di no gusta papia tocante e emocion- y experiencianan desagradabel.
Sintimento di culpa: Tin hopi di haber cu e lealtad na e mayornan y famia, a pesar cu e delito cometi ta un delito penal. Na Aruba nos ta papia di ‘nos cultura’, unda e lasonan familiar ta hopi fuerte y e famianan hopi biaha ta biba den un cas, cu por pone mas obstaculo pa haci denuncia.
Escala chikito: Bibando riba un isla, unda cu tur hende conoce otro, ta hacie mas dificil pa bin dilanti y papia di un caso di abuso sexual.
DOBEL MORAL
“Mas y mas mi ta convenci cu nos ta bibando riba un isla cu dobel moral y e organisacionnan tambe ta vocifera esaki. Di un banda papia cu sexualidad ta malo y vies y di otro banda e ciudadano mes ta constantemente bezig cu e actonan sexual. Specialmente si nos mira e datonan alarmante y creciente di malesa transmitibel, cantidad di incest, violencia domestico, abuso di mucha bou di 4 aña, cu ta esun mas practica, acoso sexual (hasta como joke). Sin laga afo cu nos hobennan entre 11-13 aña ya ta sexualmente activo, sin a haya un educacion di salud sexual debidamente ni na cas of scol, paso den nos sistema di enseñansa e materia aki no ta ni ancra den nos curiculo y p’esey no ta obligatorio pa tur scol duna educacion di salud sexual y na cas e ta topico ainda taboe”, Ras a finalisa bisando.

Comments

comments