Recientemente Famia Hugo y Gwendeline van Trikt-Rojer a ricibi e grato noticia cu nan yiu muhe, Kiara Nikita van Trikt a gradua y lo ricibi su bul como Dentista. Presentacion di su bul y huramentacion cu orguyo y hopi emocion a wordo presencia pa su mayornan, ruman, famia y amigonan.
Kiara a caba su VWO na Colegio Arubano na 2011 y a dicidi pa continua su estudio como dentista na Universidad di Amsterdam, cual estudio ta di 6 aña total. Na 2014 e a ricibi su Bachelor’s y awor su Master’s. Alavez Kiara a haci su buitenlandse stage na Indonesia.
Banda di su estudio semper Kiara a keda practica su deporte faborito cu ta landamento sincronisa y cu a brind’e varios oportunidadnan pa retonan competativo y determinacion positivamente representando Aruba Internacionalmente y asina tambe e a gosa di e titulo extra ordinario di topsporter na su Universidad.
Siguiendo paso di su tata, Dentista Hugo van Trikt, e ta drenta servicio na Van Trikt Dental Aruba y ta forma parti di e ekipo profesional cu dedicacion pa nan pashentnan pa sigui brinda nan servicio optimal na tur aseguradonan di AZV y aseguradonan Particular y na henter comunidad di Aruba.
Nos ta felicita y desea Dentista Kiara van Trikt hopi exito den su carera profesional y ta orguyoso di nos yiu di tera cu ta regresa Aruba.