Diasabra awor ta observa Dia di Cuidado di Preso (bewaardersdag), cu ta un momento importante pa para keto pa refleha riba e trabou di un trahado di prizon. “E ta un trabou importante, no solamente pa e cadena hudicial, pero tambe pa e comunidad. Los cu e ta un trabou hopi importante, e ta un trabou cu ta trece riesgo pa e trahadonan, cu ta motibo pa elogia nan pasobra e ta un trabou di aprecia”, asina Rocco Tjon, director di Korrectie Instituut Aruba (KIA) a duna di conoce.
Ta bon pa menciona cu actualmente tin un total di 174 empleado den KIA, aunke cu e plan di formacion nobo ta habri espacio pa recluta mas empleado, cu lo duna contenido na e parti di resocialisacion y reintegracion di e detenidonan. Tambe directiva di KIA ta reevaluando e opleiding pa bira cuidado di preso, pa asina duna nan mas herment pa por haci e trabou den un forma mas eficiente.
Banda di e hermentnan pa traha mas facil, e directiva nobo di KIA ta brindando mas sosten den forma di brinda cursonan y otro metodonan, ta purba eleva y motiva tur e empleadonan eyden. “Mi ta gradici tur esunnan trahando den KIA, pasobra e no ta un trabou facil. Hopi hende ta kere cu ta djis habri porta of cera porta, pero esey no ta e caso. E grupo di persona cu ta atende cune no ta facil, pa cual ta rekeri hopi curashi pa eherce e trabou aki”, asina Rocco Tjon a termina bisando.
Korrectie Instituut Aruba, KIA a muda pa su localidad na Santo di Patia na San Nicolas dia 22 di September 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.