Recientemente Colegio San Antonio a organisa un “Dia di Carera” cu a conta cu presencia di hopi diferente instancia, incluyendo KIA. Jenny Loepstok, kende for di aña 1983 ta traha como Bewaarder den prizon y despues durante añanan a pasa pa e departamento di recurso humano di KIA tabata entre esunnan cu a bishita e scol pa comparti palabranan di motivacion cu e hobennan y invita nan pa ora nan yega e edad di 21 aña pa nan solicita pa traha na KIA, cual ta inclui un opleiding special.
Jenny Loepstok a splica cu ta trahando riba un “opleidingsplan” nobo cu ta inclui un liña di carera pa tur cu solicita pa traha na e institucion. Loepstok ta un di e personanan encarga cu solicitud pa trabao, unda ta cuminsa cu un screening, despues entrevista, sigui pa diferente test pa determina kende ta entre e miho nan pa scoge nan pa cuminsa e opleiding.
Tin un vision nobo na KIA y ta exigi un diploma di (minimo) EPB Doorstroom of MAVO y pa e persona tin 21 aña of mas. Unda cu anteriormente e opleiding pa traha na KIA tin un duracion di un aña, esey ta conociendo cambio tambe y ta bira un opleiding di tres aña pa cual ta buscando un reconocemento como MBO opleiding. E status nobo di e opleiding ta habri porta pa e graduado/trahado por sigui crece miho, mas lihe y cu un bon fundeshi den su carera, sea na KIA of den otro departamento.
E proceso ta andando pa cuminsa anuncia e oportunidadnan pa solicita ya den luna di januari proximo caba. E miho conseho cu ta duna e muchanan ta pa nan haci tur cu nan por, na maximo esfuerso, pa nan slaag. E diploma ta algo cu nunca por kita di un persona, e ta di dje y e ta habri porta pa e persona por sigui crece den su estudio y carera. E ta agrega cu esunnan cu no completa nan diploma ta haya duele despues; esey ta lamentabel.
Beveiliger Eithel Kingsale tambe a forma parti di e team cu a bishita Colegio San Antonio. El a splica di su trabao y e retonan. No tur dia ta mesun dia, el a bisa, subrayando cu di un momento pa otro cosnan por escala y e training cu e persona ta ricibi ta resulta den actuacion rapido den cualkier situacion. E representantenan di KIA a splica e trabao di “inrichtingswerkers”, “interne bijstandsteam” y di e K-9 team. Ora cu nan a caba e presentacion, nan a invita e hobennan pa pasa p’afo di e klas pa cera conoci cu un di e cachonan cu tabata wardando den e van special di K-9 di KIA.
KIA ta gradici Colegio San Antonio pa e oportunidad di por presenta nan trabao y funcionnan na e hobennan di e scol, unda cu riba e Dia di Carera a provee nan cu hopi informacion pa yuda nan scoge nan estudio avansa y nan trabao pa futuro. Sigui cana den bon caminda, evita problema riba caya y cu Polis y biba un bon bida, Eithel Kingsale ta conseha, asina e chensnan ta mas grandi pa aceptacion na un departamento manera KIA ta cu ta traha pa mantene siguridad na Aruba halto.
Korrectie Instituut Aruba, KIA a muda pa su localidad na Santo di Patia na San Nicolas dia 22 di September 1990, pues 26 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.