Kevin Gumbs, docente y coreografo profesional tabata di bishita na Departamento di Cultura Aruba (DCA) caminda cu el a gradici DCA pa e apoyo cu el a ricibi.
Drs. Astrid Thiel, director interino a expresa na dje cu DCA a apoya Kevin y cu su produccion Skin by Kevin Gumbs como un yiu di tera. A haci esaki consciente cu e ta e dos presentacionnan cu a forma parti di su finalisacion di su estudio.
Kevin ta un docente di baile, coreografo y bailado profesional, kende ta termina su master 2do grado. Kevin tin plannan pa bin bek Aruba despues di explora internacionalmente. E ta desea di aporta riba tereno di baile na Aruba na un forma profesional dunando bek na nos hoben y personanan adulto tur loke el a ricibi como profesional pa enrikece nan talento den baile. Normalmente e tin 5 luna di stage den exterior. Akinan el a escoge pa bin Aruba pa duna aporte y comparti su conocemento cu nos hendenan. El a duna lesnan durante su stage na Scol di Baile Diana Antoinette, Step by Step Dance Academy, Youth in Action y tambe via docente di CKV a duna les na John Wesley College. Kevin ta hopi contento di a scoge Aruba y cu e oportunidad cu el a ricibi di haci su presentacionnan.
Durante e produccion aki di SKIN, Kevin no a uza disciplina di baile so, sino a incorpora Canto, Musica, Poesia y Teatro. Tambe a inclui nos artistanan, bailarin, bailarina, musiconan local manera Natusha Croes, Tito Rivera, Jhon Freddy Montoya, Petra Smit, Empire Dancers, Popcorn Dancers, Step by Step Dance Academy y artistanan invita Alydia Wever, Pierreangely Wever, Jeanedy Semeleer, Rosabelle Illes, Edjean Semeleer y Tommy-Lee Halman.
Departamento di Cultura Aruba bou auspicio di Ministerio di Cultura ta orguyoso di a mira un yiu di tera cu a inicia den nos proyectonan di Competencia Hubenil Gang di Arte, a sigui cu su pasion y awe ta un profesional riba tereno di baile. Drs. Thiel na final a desea Kevin tur clase di exito cu su estudio y den su carera profesional.