Marina Real Hulandes e aña aki a logra interseptá un kantidat rèkert di droga den Region Karibe Hulandes. Esaki a sosedé en koperashon ku partnernan internashonal. Zr.Ms. Holland último simannan ku a transkurí a enkontrá 4 transporte, pa un kantidat di mas òf ménos 3.000 kilo di kokaina. Ku esei e total den 2022 ta yega kasi 35.000 kilo na kontrabanda ku a interseptá.
Durante último kapturanan kada biaha di nobo e avion patruyero di Wardakosta Region Karibe a deskubrí un ‘go-fast’. Riba esaki un helikòpter di Wardakosta Merikano ademas di e botonan rápido FRISC a keda desplegá. Esakinan a logra di stòp e transportenan di droga.
E sospechosonan a keda arestá na e sitio mes. Nan a keda entrega na outoridatnan Merikano pa persekushon na Estádos Unídos. E kantidatnan di droga entretantu ya a keda destruí.
Barku Patruyero
Zr.Ms. Holland desde Òktober 2022 ta e barku patruyero den Region Karibe Hulandes. E barku patruyero aki ta traha hopi djaserka durante operashonnan anti droga ku Wardakosta Merikano i Wardakosta Region Karibe Hulandes.
Zr.Ms. Holland den mas o ménos 2 luna ya a logra interseptá kasi 10.000 kilo di droga. Zr.Ms. Friesland a sòru ku kasi 4.000 kilo no a logra subi merkado i Zr.Ms. Groningen a sòru pa kapturanan di mas ku 21.000 kilo total.
